Daniel pillugu suliaq paamaarukkaat
Kalaallip tunumeersup inuusuttup Danielip Københavnimi Amagerbro Torvimi 2014-imi oktobarip arfernani toqunera pillugu suliaq Københavnip Politiivinit suli misissuiffigineqarpoq.
Københavnip Politiivini eqqartuussissuserisup pisortaata Dorit Borgaardip KNR-imut oqaatigaa Napparsimasut Isumannaatsumik sullinneqarnissaannut Aqutsisoqarfiup oqaaseqaatissaa politiit maannakkorpiaq utaqqigaat.
Peqqinnissaqarfimmi sulisut akornanni aamma peqqinnissaqarfimmi oqartussat akornanni akisussaaffinnik agguataarinikkut inatsisinik unioqqutitsisoqarsimasinnaanersoq aqutsisoqarfimmit misissuiffigineqarpoq.
Aamma atuaruk Daniel pillugu suliaq suli naammassineqanngilaq
Tamanna oktobarimi 2015-imi, Danielip toquneranit ukioq ataaseq qaangiuteersoq, peqqaarpoq. Napparsimasut Isumannaatsumik sullinneqarnissaannut Aqutsisoqarfiup taamani oqaaseqaateqarnissaa qaammatinik sisamanik sivisussuseqarpoq, oqaaseqaatigineqartorli naammagineqarani.
- Napparsimasut Isumannaatsumik sullinneqarnissaannut Aqutsisoqarfimmut pappilissanik nutaanik maajip 25-ani 2016-imi nassiussivugut suliamilu unnerluussuteqartoqarnissaanut apeqqummut pingaarutilimmik ilassutitut oqaaseqaateqartoqarnissaa noqqaassutigalugu. Taamaammat unnerluussisoqarnissaanut apeqqutip unnerluussisussaatitaasunit isummerfigineqannginnerani oqaaseqaat taanna utaqqimaartariaqarparput, eqqartuussissuserisut pisortaat Dorit Borgaard KNR-imut mailikkut taama allappoq.
Daniel pillugu suliap pinerluttuliornertut misissuiffigineqarnera Borgaardip aamma ilisimatitsissutigaa.
Aamma atuaruk Daniel pillugu saaffiginnissutit piniarlugit politiit ajornartorsiorput
Aamma atuaruk Pisortaq: Danielimut tunngatillugu 'inuiaassuseq aallaavigalugu pingaarnersiuisoqartarsimarpasippoq
Upalungaarsimasut nangaasimasut
Suliaq uissuummissutaavoq, Daniel Københavnimi Amagertorvimi ullup qeqqata missaani ilisimajunnaaqqasoq nassaarineqarmat arnaq ikiortissamik piniarluni sianermat, politiinullu kalerriuteqartarfimmi sulisut apeqqutigimmassuk ajoqusersimasoq "danskiunersoq imaluunniit kalaaliunersoq".
Politiilli ingerlaannaq ornigutinngillat. Aamma Region Hovedstadenimi upalungaarsimasussaatitaasut kalerriuteqartarfimmut 1-1-2-mut sianertoqaraluartoq ambulancenik ornigutsitsinngillat.
Sianertoqaqqaarneranit nalunaaquttap akunnerata affaa qaangiutereersoq aatsaat ambulance takkuppoq. Ajoraluartumilli kingusinaarpoq. Daniel Amagerbro Torvimi nunami nalalluni toquvoq.
Danielip sumiuunerata apeqqutigineqarsimanera Københavnip Politiivisa aallaqqaammut ilumuunnginneraraluarpaat. Tamannali kingornatigut nassuerutigineqarpoq ajuusaarutigineqarlunilu, aviisimmi Politikenip oqaloqatigiittoqarneranit immiussaq pissarsiaraa, tassanilu erseqqilluinnartumik tusaaneqarsinnaavoq taamatut apeqquteqartoqartoq.
Eqqartuussissuserisut pisortaata Doris Borgaardip KNR-imut siornatigut ilisimatitsissutigaa suliap paasiniaaffigineqarnera kinguaattorfiusoq, Københavnimi februaarimi 2015-imi peqqarniisaarniartoqarneranut atatillugu suliassaqarpallaartoqarnera pissutigalugu.
Aamma atuaruk Angerlarsimaffeqanngitsup toqunerata kingorna piareersimasuutitat isornartorsiorneqartut
Aamma atuaruk Københavns Politi oqarasuaatikkut kalerrisaarummut tunngasumik sallusimallutik nassuerput