Dalai Lama perulluliornernut pisuutippaat

Kinamiut Dalai Lamallu aaqqiagiinninnerat ukiut 50-it matuma siorna aallartippoq.

Tibetimiut Kinamiunut saassussisunut akersuukkaluarnerannit ukiut 49-t qaangiunnersiorlugit akerliussutsimik takutitseqattaalerput.

1950-imi Kinami Mao Tse Tung mumisitsisimatsiaannartoq, Kinamiut qaqqarsuit Himalayat itivillugit Tibetimut isaapput. 1959-imi tibetimiut akerliullutik mumisitseriaraluarput iluatsinngitsumik, tibetimiullu tusindillit toqutaanerannik kinguneqartumik. Malitsigisaanik tibetimiut anersaakkut siuttuat, Dalai Lama, qaqqarsuit itivillugit Indiap avannarpasinnerusortaanut qimaasariaqarsimavoq. Taamanili tassanngaanniit Tibeti naalakkersorneqalerpoq.

Dalai Lamap arlaleriarluni Tibetip namminersulernissaa, Kinamiillu politikkikkut aqunneqarunnaarnissaa piumasarisarpaa, Kinamiunilli Tibetip namminersulivinnissaa anguniarnerarlugu pasineqartarluni.

1960-ikkunni Kinami kulturikkut mumisitsisoqaleruttortoq Kinamiut sakkutuui Tibetimut isaapput mattuffiit matoorlugit, Buddhasiortut illernartuutitaat sequtserlugit, angutit arnallu mattuttut pinngitsaalillugit mattuttuujunnaarsillugit. Taamanili Kinamiut Tibetimi pissaaneqarnerulerput, akerliuniartaraluartut ingerlaannaq akiorneqapiloortarput mattuttutullu inuusut Dalai Lamamik tapersersuinerarlugit paarnaarunneqartarput naalliutsinneqartarlutillu. 1960-ikkunnili Kinamiut naggueqatigiit Han-inik taaneqartartut amerlasoorpassuit Tibetimut isaapput maannakkullu aningaasaqarneq aqullugu atorfiillu pitsaanerit pisarlugit. Tibetimiut kulturitoqarsuat navianartorsiortinneqarpoq, Kinamiummi maanna peqqarniitsumik naqissusernialinnguatsiarmassuk kikkut Tibetimi pissaaneqartuunersut.