Dalai Lama: Oqaloqatigiinneq aallartinniarsiuk
Tamatuma peqatigisaanik pisortat oqaatigaat ”inuinnaat pisuussuteqanngitsut” ikinnerpaamik qulit eqqissiviilliornerni, ukiut qulikkaat marluk ingerlaneranni aatsaat taamak sakkortutigisuni, toqutaasimasut.
Eqqissiviilliornerit sakkortuut pipput, naak Kinamiut oqartussaasut oqaraluartut aggustimi Beijingimi OL-eqarnissaa sioqqullugu Tibet eqqissisimaffiusoq.
Tusarfiit tutsuiginartut, Lhasami oqartussaneersut oqaatigaat, eqqissiviilliornerni toqutaasut nalunaarutigineqartunit amerlanerusut. Akerliussutsimik takutitsisut ikinnerpaamik tallimat sakkutuunit aallaaneqarlutik toqunneqarput, allalli oqaatigaat toqutaasunik amerlanerusunik takusimallutik.
Kinap Tibetimut politikkia akerliuffigalugu nunanit allaniit akerliusut ullumi nalunaartut amerlaqaat.
Eqqissiviilliorneq Dalai Lamap Tibetip saniliani Indiami qimarnuimminiit tallimanngormat ima oqaaseqarfigaa:
- Akerliussutsimik takutitsinerit maanna naalakkersuinermik ingerlatsinermi Tibetimiut narrunarsagaanerujussuannit aallaaveqarput. Taamaattumik Kinamiut aqutsisut kajumissaarusuppakka, pissaanermik atuinertik unitseqqullugu, Tibetimiullu qangalili qamuuna kamassimanerat sumiginnaqqunagu, Tibetimiunillu oqaloqateqarnermik aallartitseqqullugit, Tibetip anersaakkut siuttua oqarpoq.
