Dalai Lama George Bushilu naapipput

Præsident Bush Dalai Lamalu aatsaat naapilinngikkaluarput, siullerpaamilli pisortatigoortumik naapittussangorput. Amerikami naalagaaffeqatigiit inatsisartuinit Dalai Lama aqagu Amerikami nersornaatit ataqqinarnersaannik, kuultimik saqqarmiulerneqassaaq, tamannalu ataqqinninniarnermik takutitsiinnarani aammali Buship Amerikamilu inatsisartut Tibetimi inuit pisinnaatitaaffiinik soqutigininnerinik ersersitsivoq. Budhasiortut qullersaata oqaaseqartartua oqarpoq, Dalai Lamap pisortatigoortumik Washingtonimi tikeraarnera Tibetimiunut qiimmassaataaqisoq, pisummi takutimmassuk Dalai Lama tammarallarnaviangitsoq. Dalai Lamap Tibetip namminersuleqqinissaa anguniartuarpaa, Kinalli Tibeti tiguarnikuuaa, oqaluttuarisaanermillu tunngaveqarnerarlutik Kinamut atasutut isigalugu. Dalai Lamap Washingtonimut tikeraarnera Kinami nunanut allanut ministereqarfianiit oqaaseqartartup oqaatigaa, USA-p Kinallu akornanni pissutsinik ajortitsissaqisoq, Dalai Lamali Naalakkersuisunik suminngaanneersunilluunniit naapitsigaangat Kinamiut taamatut qisuariartuaannarput. USA-p Kinallu akornanni pissutsinik nalunnginnittut Dalai Lamap tikeraarnerata sunniuteqangaarnissaa ilimagingilaat. Dalai Lamalli angalasarneri Kinamiit alaatsinaanneqaqaat, minnerunngitsumik ungasinngitsukkut Tibetip saniani Burmami mattuttut Budhasiortut akerliussutsimik takutitseqattaarnernut siuttuummata. Pisut tamakku Dalai Lamap Tibetimi pissutsinut sunniuteqarnerulerneranik kinguneqarsinnaanera Kinamiut aarleqqutigaat.

Dalai Lamap Washingtonimut pisortatigoortumik tikeraarnera Kinamiut avoqqaarliutigereerpaat.