Dagmar ilisaaqqippoq
Kaasarip nulia, Dagmar, Peter aamma Paulip Oqaluffissaarsuani ullumi ilisaaqqilerpat, aqqusinikkut angallannerup uitsaffiorujussuarnissaa Ruslandimi illoqarfiup Sankt Petersborgip siuttuisa sillimaffigaat.
Dagmarip ilisaaqqinnera innuttaasut TV-kkut toqqaannartumik malinnaaffigisinnaassavaat, illerfimmilli takunnikkusuttut, TV-rujussuakkulluunniit malinnaarusuttut, tusidtilippassuit illoqarfiup qeqqanukaassangatinneqarput.
- Pisoq uatsinnut pingaarutilerujussuuvoq. Kikkut tamat oqaluuseraat, naatsorsuutigaarpullu inuppassuit ullumikkorpiaq sulinngiffeqarumasimassasut, Sankt Petersborgimi siuttuneersoq, Olga Volkova, oqarpoq.
Kaasarip nuliata illerfia ullaaq manna Isaac-ip Oqaluffissaarsuanukaanneqassaaq. Nalunaaquttap akunnerini marluk sinnerlugit sivisussusilimmik eqqaaniaanissami peqataasussanut ilaapput kunngissaq Frederik nulialu Mary.
Zarip Alexander Pingajuata ilerrata saniani ilivissamik piareersaasoqareerpoq. Dagmar ilisaaqqereerpat toqusup illerfia maarmorimik qaqortumik qallerneqassaaq, taamaalillunilu zarit hertugillu allat 32-t Oqaluffissaarsuarmi ilerri assigilissavai.
Zarip ilerrata eqqaaniittoq ungaloq peerneqassaaq, marluullutillu allamik ungalulerneqassapput, Dagmarillu kissaatiginerpaasani pissavaa, tassa uimi saniani ilisaanissi.
