"Da Vincip isertugaatai" Savalimmiuni takutinneqassanngilaq

Atuakkap tusaamasarsuup ”Da Vinci-p isertugaatai” – ”Da Vinci mysteriet” - filmiliarineqarnera tallimanngorpat tulliani takuteqqaarneqassaaq – kisianni Savalimmiuniunngitsoq. Savalimmiuni Thórshavnimi Klaksvigimilu filmertarfiutillit filmi takutikkusunngilaat.

- Filmi inerteqqutigitinniarlugu aalajangersimavugut. Guutimik mitaatiginnittuuvoq. Nordisk Film – filmimik tassannga nassiussuisuusoq – aperigatsigu, filmi atuakkap imaanut naleqqussagaanersoq, akuersaarmallu, aalajangerpugut takutinniarnagu, Thórshavnimi filmertarfimmi pisortaq, Jákup Eli Jacobsen, aviisimut Sosialurinimut oqarpoq.

Nassuerporli atuagaq nammineq atuarsimanagu.

- Oqaluttuunneqarnikuuvungali, Jiisusi arnamik meeqqiortitsisoq filmimi takutinneqartoq. Taannaannarluunniit eqqarsaatigalugu filmi takutinniarnagu aalajangersimavugut, Jákup Eli Jacobsen oqarpoq. Taassuma ernummatigaa, filmimik Guutimik mitaatiginnerpaluttumik Savalimmiuni takutitsigaluaruni filmertarfiuteqarerminik akuersissut annaasinnaagini.

Savalimmiuni filmertafiutillip aappaata, Klaksvigimiittup, filmip takutikkusunnginneranut asserluinnaanik isumaqarpoq – Nuummili Katuami taamaassimagunanngilaq – filmi taannarpiaq sapaatip-akunnera ataaseq qaangiuppat takuteqqaarneqassaaq.