Da Vinci Katuami takutinneqassaaq
Filmi Da Vinci Savalimmiuni takutinneqartussaanngilaq, Kalaallit Nunaannili taama pisoqarnavianngilaq. Taama oqarput biskop Sofie Petersen aamma Katuami pisortaq Juaaka Lyberth, Atuagagdliutinut ullumi saqqummersumut.
Da Vincimik filmiliap nutaap, Jiisusip Maria Magdalenemut katissimaneranik, taassumalu kinguaavisa ullumikkut suli inuunerannik eqqoriaanermik ilaatigut imaqartup, isiginnaariaqqusaannginnissaanik ilagiit katuullit oqaatsit sakkortuut atorlugit kaammattuuteqarput. Filmi nunarsuaq tamakkerlugu tallimanngorpat takuteqqaarneqartussaavoq, aamma kulturikkut illorsuatta Nuummiittup, Katuap, filmertarfiani. Katuami pisortaq, Juaaka Lyberth, filmip takutinnissaanut nangaanngilluinnarpoq:
- Filmi isiginnaarusunnerlugu isiginnaarusunnginnerluguluunniit inuit namminneq aalajangersinnaavaat. Isiginnaariartartutsinnut naalagaaniarusunngisaannarpunga, Juaaka Lyberth AG-mut oqarpoq.
Biskop Sofie Petersen isumaqataalluinnarpoq.
- Savalimmiuni ilagiit malinninniaqqissaartuunerullutillu allassimasunik upperinneqqissaarnerupput. Tamatuma peqatigisaanik ilagiit upperisarsiortut sammivii arlaliupput, taakku Kalaallit Nunaanni pissutsinut allaanerusumik sunniuteqarput.
Tamaani inerteqquteqartoqarsinnaanngisaannassaaq. Taamalu pisoqaraluarpat tamanna paarlattorluinnaanik sunniuteqassagaluarpoq, Sofie Petersen AG-mut oqarpoq.
