D-vitaminikilliorneq: Meeqqat peroriartornermikkut akornutigisinnaavaat
- Meeqqat D-vitamininik amigaatillit ilisarnaartigikkajuttarpaat alliartornerminni saarngimikkut akornuteqalerneq. Saangit equngalersinnaasarput. Taavalu nissumikkut anniartalersinnaallutik. Qasujanerusarput ilaalu uumilanerusalertarlutik.
Dronning Ingridip Napparsimavissuani meeqqat nakorsaat Ingrid Hjuler taama nassuiaavoq.
Aamma oqaatigaa saarngit napialernerannik, aakilliornermik, timip illersuutaata ajorseriarneranik qaratsallu ineriartornerata amigaateqalerneranik tamatumalu malitsigisaanik ilinniarnermikkut ajornartorsiuteqalernerannik kinguneqarsinnaasoq.
Tamakkua ajornartorsiutaalersinnaasut pinaveersaartinniarlugit meeqqat mikineriniilli peqqinnartunik, vitamineqarluartunik assigiinngisitaartunillu nerisaqarnissaat pingaaruteqartoq, Kujataani nakorsaanerup Jan Færkip oqaatigaa.
D-vitamininik amigaateqartarneq nunatsinni kisimi ajornartorsiutaanngilaq.
- D-vitamiininik amigaateqartarneq nalinginnaasuuvoq. Nunat allat eqqarsaatigissagutsigit Kalaallit Nunaata meerartai kisimik D-vitamiininit amigaateqanngillat.
Inga Hjuler taama oqarpoq.
Taassuma siunnersuutigiinnarsinnaavaa peqqinnartunik meeqqat nerisaqartinnissai.
- Multivitaminitortaraanni D-vitamini pineqarsinnaavoq. Taakkuani vitamiinini D-vitamiit akooreerami. Taakkuninnga pisaraanni D-vitamininim amigaateqalersinnaaneq pinngitsoortinenqarsinnaavoq. Aamma pingaartumik kalaaliminertortarnikkut D-vitamini pineqarsinnaavoq. Soorlu aalisagaq orsoqarluartoq D-vitamineqarluarpoq. Aamma meeqqat seqinnarimmi aneersinneratigut D-vitamiini pineqarluarsinnaavoq. Seqerngup qinngorneratigut D-vitaminit pinqarsinnaammata.
D-vitamiini tassaavoq saarnginik kigutinillu illersueqataasartoq, timillu illersuutaanik aamma illersueqataasartoq. Timeq D-vitamiineqarluaraangat timeq nukissaqarnerusarpoq, inuullu qanoq inneranik aamma sunneeqataasarluni.
