Illuatungiliuttut ataatsimiititaliami inissaqarpallaanngitsut
Naalakkersuisoqatigiimmi Siumut, Inuit Ataqatigiit Parti Nalerarlu amerlanerussuteqarluarnertik atorluarlugu illuatungiliuttut ataatsimiititaliani amerlanerni peqataatinngilaat.
Inatsisartuni sulinermi inatsisissatut siunnersuut Inatsisartuni pingasoriarluni oqallisigineqartarpoq. Siunnersuutit oqallisigineqarnerisa nalaani ataatsimiisitalianut ingerlateqqinneqartarput misissoqqissaarneqareeraangasalu isumaliutissiissummik sanasoqartarpoq, isornartorsiutit apeqqutillu tassunga tunngasut oqallisigisassanngortinneqartarlutik.
Ataatsimiititaliat assigiinngitsut marluupput tallimanik arfineq marlunnillu ilaasortallit. D'hondtske tunngavigalugu ilaasortassat agguaanneqartarput, tamatuma kinguneraa naalakkersuisoqatigiit amerlanerussuteqarluarnermikkut ataatsimiititaliani tallimanik ilaasortalinni illuatungiliuttut inissaqartinneqaratik, ataatsimiititalianili arfineq marlunni ilaasortalinni illuatungiliuttut ataatsimik ilaasortaatitaqartarlutik.