Cykilertartup Michael Rasmussenip salluliorsimanini nassuerutigaa
Cykilertartoq Michael Rasmussen inuiaqatigiinnut salluliorpoq, Tour de France-qartinnagu Italiamiinnani Mexicomiissimalluni oqarami. Salluliorsimanini tusagassiortunik ullumi katersortitsinermi nassuerutigaa.
-Juunip qaammataani Mexicomiinngilanga. Cykilertartut Peqatigiiffiannut, UCI-mut, inuiaqatigiinnullu kukkusunik paasissutissiivunga. Tamanna ajuusaarutigaara, Michael Rasmussen oqarpoq.
Michael Rasmussenip sallunerminut peqqutaanerarpaa, Tour de France-p aallartinnissaata tungaanut tusagassiortunit alapernaanneqarpallaarusunnginnami, aappariinnermini aamma ajornartorsiuteqarsimavoq, taamaammat akornusersorneqarusussimanani.
Qasujaallisaatinik atuinngisaannarsimanini Michael Rasmussenip aamma aalajangiusimavaa.
-Eqqortup oqaluttuarinissaanut piffissanngorsorigakku maanna taamaaliorpunga, Rasmussen oqarpoq.