Cykelertartoq tusaamasaq nukkassaatitortarpoq

Sukasaatinik dopinginik atuisarpunga, taamatut imminut qulaarluni atuakkami nutaami nassuerpoq danskeq cykelerluni unammisartoq nuannarineqarluartorlu Jesper Skibby.

Aviisimi Ekstra Blademi atuagaq nutaaq taanna Jesper Skibby-mit aviisillu tusagassiortuisa ilaannit allanneqarsimasoq ullumi tigulaariffigineqarpoq.

- Matukkut kasuttorluni kapuummik nukkassaammik imalimmik neqeroorfigimmanga nukappiarannguatut juullimi poortugarsiarujussuarmik tunisittutut misigivunga.

Taamaalillunilu Jesper Skibby nakorsaammik piginnaasaminiit qaffasinnerusumik sukannernerulersitsiniartussamik siullerpaamik atueqqaarpoq.

Jesper Skibby nassuiaavoq, atuakkap taama saqqummiunneratigut salliutikkini ukiuni 20-ini cykelerluni unammisartutut angusarissaarluni nammineq imminut ajorinini pillugu taamatut atuakkiorusussimalluni.

- Iliuuserisimasakkali peqqissimissutiginngilakka, aamma tamanna isumanerluutigilinngilara. Timersornikkut angusarissaassaguma uannut ikiuutaasussat atorsimavakka, tassa taama nassuiaatitassaa annikitsigaaq, Jesper Skibby atuakkiamini taama ilaatigut allappoq.