Cubamiu Sakarov-imik nersornaaserneqarpoq
Cubamiu taanna 20-riarluni sinnerlugilluunniit neriumajunnaartarsimavoq.
Cubamiup Guillermo Fariñas-ip peqqissutsini akigalugulusooq Cubami pissutsinik pitsanngorsaaniarnini pillugu akissarsisinneqarpoq.
Guillermo Fariñas ulluni 135-ini neriumajunnaarsimanini pillugu tusaamaneqalertoq, tusagassiortoq Cubamilu pissutsinik ilisimaarinnittoq, Jørgen Laurvig oqaluttuarpoq. Fariñas-illu naalakkersuineq pillugu parnaarussat iperagaatinniarlugit sorsuuteqarpoq. Taakkua aasaq manna junimi tulleriiaarlugit iperarneqartalerput.
Imaanngikkaluarpoq Fariñas-ip neriumajunnaarnera iperaanermut tunngaviusoq. Cubamili katuullit ilagiit isumaqatiginninniarnerat Spaniamilu naalakkersuisut saamerliusut tatisinerat pinerullugu iperaasoqartoq Laurvig oqaluttuarpoq.
Spaniap naalakkersuisuisa Cubap EU-mut attaveqarenera nukittorsarusuppaat Cubamiullu ajunngitsumik iliuuseqarnissaat anguniarlugu naalakkersuineq pillugu tigusanik iperaatitsisillugu.
Fariñas isornartorsiuisartullu allat annerusumik sunniuteqanngillat isornartorsiuisartummi Cubamiut ilisimasaqarfiginngilluinnarpaat. Jørgen Laurvig-ilu oqarpoq nammineq eqqoriarsinnaallugu Cubamiut tarmarluinnangajammik isornartorsiuisartoq ataaserluunniit tusarsimanngikkaat.
Kinamiu Nobel-ip nersornaasiuttagaanik qanittumi tunineqarmat Kinami oqartussaasut sakkortuumik assuarlerput, Cubamiullu taamatut periarsinnaanersut aperineqarami Laurvig oqaluttuarpoq maanna akissarsisitsineq EU-p iluani pissaaneqarniunnermut atasoq EU-llu Cuba pillugu politikkia EU-mi inatsisartuni qanittumi eqqartorneqartussaammat EU-mi ilaasortat konservativiusut saamerlertatik Cubamut qaninngoorniarsarisut misigitinniarsimagaat, DR taama ilanngutassiivoq.
