Cubami Castrop inunngorneranit ukiut 100-nngortorsiorneq pissutsit ajornartorsiorfiungaartut nalaanni nalliussineqartoq

Cubami præsidentiusimasup Fidel Castrop inunngorneranit ukiut 100-nngortorsiorneq sisamanngornermi nalliussippassuk, tamanna nunami ukiuni qulikkuutaani ajornartoornerpaaffiusut nalaanni pissaaq.

Ajornartoorneq Cubamiorpassuarnit Fidel Castrop siuttuujunnaarneranik pissuteqarsorineqarpoq, Castrolli isornartorsiuisuisa ajornartoornerit Castrop kommunistiskiusumik aqutsinerata kingunerattut isigaat.

Cubamiorpassuit isumaqarput Fidel Castrop naalakkersuisuujunnaarnerata pissutigisaanik ajornartorsiortoqarsimasoq, isornartorsiuisulli isumaqarput Castrop kommunistiusumik politikkiata kingunerisaanik atugarliortoqarsimasoq.

Nutaarsiassaqartitsivik AFP taama allappoq.

Fidel Castro Cubami ukiuni 50-ingajanni aqutsisuuvoq – siullermik ministeriunertut kingornalu præsidentitut – napparsimanini pissutigalugu qatanngutiminut Raul Castromut 2006-imi naalakkersuisunngortitsinnginnermini.

Cubamik aqutsiunnaarneranit ukiut 20-nngortullu, Cuba aningaasaqarnikkut ajornartorsiorpoq, nerisassaaleqineq, imissaaleqineq innaallagiaaruttaqattaarnerlu ulluinnarsiutaalersimallutik.

USA-p præsidentiata Donald Trumpip qeqertamut naalagaaffiusumut akerliuniarnermut atatillugu uuliamik pilersuinermik januaarimi matusinera, ajornartoornermik ajorseriartitsivoq. Akerliuniarnermi ukiuni 60-ini kommunistiskiusumik aqutsineq unitsinniarneqarpoq.

Cubamiut Fidel Castrop aqutseriaasianik maqaasinnittut ilagaat Leonel Suarez 54-inik ukiulik, AFP-mit apersorneqartoq.

- Fidel piffissami imaattumi periusissiorsimassagaluarpoq, Leonel Suarez Cubami angerlarsimaffimmini igalaamini Castrop assinganik assiutilik oqarpoq.

Tapersersuisut Castro nersualaaraat

Tapersersuisut Suarezitut ittut, Fidel Castro aqutsisutut Cubamiunik, Amerikamiut tapersersugaannik sakkutuulersuinerit nalaanni, eqqusseqqusinnginnerit nalaanni, toqutsinissamik pilersaarusiortoqarnerani Sovjetunionillu uppititaanerata kingorna ajornartoornerit allat nalaanni, siulersuisutut eqqaamavaat.

Tapersersortiisa ilaat alla, 54-inik ukiulik Rogelio Valdivia, isumaqarpoq Fidel Castrop kingoraartissaanik piukkunnartumik allamik peqanngitsoq.

- Mumisitsinerup nalaani inunngorpunga siunissamullu aqqutissannik nassaarsinnaanikuuvunga, taanna AFP-mut oqarpoq.

- Fidel akornatsinniikkunnaareerpoq, Fidelitullu piginnaaneqartoqanngilaq.

Fidel Castro kommunistiusoq, Cubami mumisitsinermut Cubap 1950-ikkunni naalakkersuisuata Fulgencio Batistap, USA-mit tapersersorneqartup, uppititaaneranik kinguneqartumut siuttuuvoq.

Manuel Cuesta, oqaluttuarisaanermik ilisimatooq Cubamilu illuatungiliuttut ilaat 63-inik ukiulik, Castro Cubap "annaassisuatut“ inuusuttuunermini isigigaluarlugu kingusinnerusukkut siulersuisorisimasaminut allatut isiginnittaaseqalersimavoq.

Taassuma oqarnera naapertorlugu Cubamiorpassuit Castro "inuiaat ajunaarnerannut pisuusutut“ ullumikkut isigaat, Manuel Cuesta AFP-mut oqarpoq.

Oqaluttuarisaanermik ilisimatooq alla, Hassan Perez, Cubami ilinniartut suliniaqatigiiffianni aqutsisuusimasoq Castromullu qanimut suleqataasimasoq AFP-mut oqarpoq, "inuiaqatigiinni isumaqatigiissut“, Cubami mumisitsinermut ilaasoq, piffissap ingerlanerani "piujunnaariartorsimasoq“.

Fidel Castro 90-inik ukioqarluni 2016-imi toquvoq.

RITZAU