Covid-19-imut misissorteqqittarfik Nuummi pilersinneqalersoq

Nunatsinnukartunut kikkunnut tamanuunngikkaluartoq Covid-19-imut misissorteqqittarnisaq Nakorsaanermit Henrik L. Hansenimit innersuussutigineqarpoq.
Assi © : KNR
septembarip 19-at 2020 11:33

Nunatsinnut angalasunut nutaanik innersuussutinik ippassaq saqqummiussisoqarpoq.

Tamatumunnga atatillugu Nuummi misissorteqqittarfissaq piareersarneqaleruttorpoq. Peqqussutsimut naalakkersuisoq, Anna Wangenheim nakorsaanerlu Henrik L. Hansen tusagassiortunik tallimanngornermi katersortitsinerminni taama ilisimatitsipput.

AAMMA ATUARUK Tamaat isigalugu: Coronavirus pillugu killiffik

Sapaatit akunnerini kingullerni marlunni coronavirusimut misissortissimallutik inuit pingasut tunillatsissimasut paasineqaramik uani erseqqissaatigineqarpoq.

Danmarkimi tunillatsittut amerligaluttuinnarnerata kingunerisaanik nunatsinni peqqinnissaqarfik nutaanik innersuussutinik saqqummiussivoq.

Nunatsinni coronavirusip tuniluutilinnginnissaa anguniarlugu, avataaniit tikittut tikinnermiit ullut tallimat qaangiunneranni misissorteqqittarput.

Eqaallisaaneq

Periutsilli eqaallisarniarlugit, peqqinnissaqarfik Nuummi misissorteqqittarfimmik pilersitsiniarpoq.

Taannalu sapaatip akunnerata tulliani aallartissaaq, Anna Wangenheim katersortitsinermi oqarpoq.

Coronavirusimik tuniluuffimmeersumit tikissimagaanni misissorteqqinnissaq nakorsaanermit innersuussutigineqarpoq.

Nunatsinnukartussat kikkulluunniit aallannginnerminni coronavirusimik tunillatsissimannginnermut uppernarsaateqartussaanerat suli piumasaqaataagaluartoq, coronavirusip nunatsinni siaruatsaalinissaanut tamakkiisumik nakkutilliisoqanngilaq.

Henrik L. Hansen tusagassiortunik katersortitsinermi taama erseqqissaavoq.

- Tunillatsissimasumik arajutsisatsinnik nunatsinnut tikittoqarsinnaaneranik kinguneqarsinnaavoq, Henrik L. Hansen oqarpoq.

AAMMA ATUARUK Danmarkimi aappaluttumik nalunaarsorsimasumiissimaguit nammineq qinikkamik aninaveersaartariaqarputit

Taamaammat Nuummi misissorteqqittarfimmik pilersitsinikkut arajutsisoorsimasat taamaalillutik paasineqartassapput:

- Taava tikittut kingulliit pissarsiarissavagut. Tamarmiusariaqanngilarli. Taamaammat nunatsinnut tikittut sinerissamut angalaqqinnginnerminni maleruaqqusat malillugit misissortittassapput - tuniluuttoqalinnginnissaa tassuunatigut anguneqassalluni, Nakorsaaneq oqarpoq.