Coster-Waldau isiginnaartitsiartorluni angalalersoq
Isiginnaartitsissut Nukâka Coster-Waldaup kisimiilluni isiginnaartitsissutigisaa, oktobarip arfernanit 22-inut illoqarfinni tallimani isiginnaartitsissutigineqassaaq. Tassalu Sisimiuni, Ilulissani, Qasigiannguani, Aasianni Nuummilu.
Isiginnartitsissut Strømsteder/Sarfartuut Danmarkip Kalaallit Nunaatalu atanerannut tunngasuuvoq. Nukâka Coster-Waldau assigiinngitsunik sisamanik inuttaaffeqarpoq, arnaq inuusuttoq kalaallisut oqaatsiminik annaasaqarsimasoq, nujalerisoq danskeq pigiliutiinnakkaminik isummersortartoq, arnaq aalakoortoq aqqusiniinnarmiittoq kiisalu tupilak. Makka Kleist aamma Flemming Jensen tassaapput anaana Kalaallit Nunaat aamma ataata Danmark avissimnasut, taakkulu tv-kkut tunuliaqutarineqarput.
- Isiginnaartitsinermi pingaarnertut sammineqartut tassaapput inuit qanga ullumilu kulturit marluusut akornanni ingerlaarnerat, ilitsersuisoq FreezeProductionsimilu eqqumiitsuliornermut pisortaasoq Hanne Trap Friis Århus Stiftstidendemut oqarpoq.
Nunatta Isiginnaartitsisarfia, isiginnaartisissummi suleqataavoq, danskillu isiginnaartitsisarfiata Nunatta Isiginnaartitsisarfiata suleqatigiinnerisa siullersaraat.
