Corydonip akissutaa IA-p naammaginartinngilaa
IA-p Helle Thorningimut Bjarne Corydonimullu allagaqarnerminni susassaqarfiit Nunatsinnut attuumassutillit pitsanngorsartariaqartut erseqqissaatigisimavaat. Ilaatigut eqqartuussiveqarneq aamma kalaallinut ikiortarialinnut isumaginninnikkut suliniutinut tunngatillugu.
Susassaqarfiit taakku danskit akisussaaffigaat, IA-llu susassaqarfinni taakkunani pitsanngorsaasoqarnissaa ukiuni arlalinni sulissutigisimavaat. Maannamut iluatsitsivallaaratik.
-Aningaasaqarnermut ministerip Bjarne Corydonip (S) akissuteqarluni allagaa eqqartoparput, tigussaasunillu aaqqiissuteqarnissamut piumassuseqartoqaranilu pitsanngorsariaqartutut ujartuiffigisimasagut pillugit oqaloqatigiinnissmaut piumassuseqartoqanngitsoq paasivarput. Tamannalu ajuusaarnartutut isigaarput, Johan Lund Olsen oqarpoq.
Aningaasaqarnermulli ministerip Bjarne Corydonip akissutaani sulinitissaq pitsaasoq ataaseq eqqaaneqarpoq, IA-llu nuannaarutigaa partiip danskit naalakkersuisuinik sunniiniarlutik annertuumik sulissuteqarsimanerata angusaqarfiuneranik takusassaqalermat.
-Aningaasaqarnermut ministeri allappoq immikkut suliniutitut isumaginninnikkut suliniutaasartut aalajangersimasumik aningaasalersorneqartalernissaannut periarfissanik naalakkersuisut misissuiniartut, tamannalu iluatsissappat pitsaanerusumik alloriarnerussaaq. Suliarlu taanna soorunami qanittumik malittariumaarparput, Johan Lund Olsen oqarpoq.
