Coronavirusip navianartuunera Trumpip piaaraluni ilisimatitsissutigisimanngikkaa
USA-p præsidentiata Donald Trumpip, coronavirusip navianartuunera piaaraluni ilisimatitsissutigisimanngikkini, nassuerutigaa. Innuttaasut ernumannginnissaat pillugu taamaaliorluni nammineq oqaatigaa.
Donald Trump pingasunngornermi taama oqarpoq.
- Uivertoqalinnginnissaa siullertut anguniarneqartariaqarpoq. Nunarput asavara innuttaasullu ersinnginnissaat kissaatigaara, Donald Trump ilaatigut oqarpoq.
USA-mi inuit 190.000-nit amerlanerusut coronavirusimik maannamut toqquteqarsimapput.
AAMMA ATUARUK Covid-19-imik USA-mi tunillanneqarsimasut aatsaat taama amerlatigisut
Coronavirus toqqutaasinnaasoq tunillaatiasuusorlu Trumpip februaarimili ilisimasimagaa, pingasunngornermi saqqummiunneqarpoq.
Trumpip tusagassiortumit apersorneqarnerani immiussat CNN-ip pissarsiarisimasaani tamanna tusaaneqarsinnaavoq. Uivertoqannginnissaa eqqarsaatigalugu coronavirusip navianartuunera tamanut oqaatigerusussimanagu oqartoq immiussani tusaaneqarsinnaavoq.
Tusagassiortup iisimaneqarluartup Bob Woodwardip atuakkiaanut nutaamut atatillugu Donald Trump 18-eriarluni apersorneqarsimavoq.