Assi: KNR

Coronavirusip ernumassutigineqarnera: Atuarfiit timmisartuussinerillu matulersut

Nunatta nakorsaanerata atuarfiit coronavirusip ernumassutigineqarnera pissutigalugu matuneqassanngitsut nalililerpaa. Politikkikkulli partiit tamarmik matuneqarnissaa piumasaraat.

Qulequtaaraq nal. 09.32 erseqqissarneqarpoq.

- Atuarfeqarfiit ataasinngorpamiit tassa marsip 23-anit ullut 14-it matoqqassapput.

Naalakkersuisut siulittaasuat, Kim Kielsen tusagassiortunik katersortitsinermi oqarpoq.

Atuarfiit "matoorneqarnissaat inuiaqatigiinnut assigiinngitsunik kinguneqarnissaat" pissutigalugu Naalakkersuisunit maannamut ammatinneqaraluarput.

Matoqqatitsinissaq ilinniarnertuunngorniarfinnut, ilisimatusarfimmut, inuusuttut ilinniarfinulluunniit atuutinngilaq.

- Inuusuttut atuarfiini atuartut inersimasuupput. Malittarisassaqarpoq, taakku tassa inuit 100-init amerlanerusut atersuutinnginnissaat eqqiluisaarluartoqarnissaalu malinneqarnissaat naatsorsuutigaarput, taakku malissagaat qularutiginngilluinnarpara, Kim Kielsen oqarpoq.

AAMMA ATUARUK Meeqqat illersuisuat: Angajoqqaat coronavirusi ernummatigaluga saaffiginnittorpassuupput

Tunillaassortunik nappaalasoqarneranut ataatsimiititaliarsuup innersuussutigaa: 

  • aaqqissuussat inunnit 100-nit amerlanerusunit peqataaffigineqartussat nangaasaarutigineqarluinnarput.

  • nunatsinniit nunatsinnullu sapinngisamik angalasoqassanngilaq. Tamanna nunatsinni angalanermut atuuppoq. 

  • illoqarfinni bussit ilaasunik ulikkaaveqqusaanngillat.

  • timersortarfiit, naluttarfiit sutorniartarfiillu isersimasorisinnaasatik affaannaat isersimatittassavaat. 

  • inuit nunami aarlerinaatilimmeereerlutik nunatsinnut utertut tikinnerminniit ulluni 14-ini tulliuttuni angerlarsimaannaqquneqarput.

  • inuit nunami aarlerinaatilimmeereerlutik nunatsinnut utertut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutissanngitsut.

Meeqqeriviit ulluuneranilu paaritittarfiit matuneqassanngillat - tassa ingerlaannaq matuneqassanngillat.

- Taakku matuneqassanersut partiit siulittaasuisa allat ingerlaavartumik isumasioqatigiinneranni aalajangerneqassaaq, Kim Kielsen oqarpoq.

Timmisartuussinerit matusut

Angajoqqaat meeqqaminnik angerlarsimasumik paarsisariaqarlutik sulisinnaanngitsut akissarsiaqartinneqassapput.

Atuarfeqarfiilli kisimi matuneqanngillat.

Tassa atuarfiit tallimanngorneq unnuap-qeqqanit atuutilersumik matuneqarpata - Air Greenlandip timmisartuutai aamma nunamiiginnassapput. Nunatsinnut nunatsinnullu timmisartuussinerit tamarmik ulluni 14-ini taamaatinneqarallassapput.

Suliniutit nutaat nunatsinni virusimik siaruaatsitsinaveersaarneruvoq.

Tamanna politikkikkut taperserneqartoq Kim Kielsenip oqaatigaa.

- Taamaalilluta siaruaattoqannginnissaa qulakkiissavarput. Tamanna akisussaaq, kisianni mianersornissarput pingaaruteqarpoq, tamanna partiit siulittaasuisa tamarmik isumaqatigiissutigaat, Kim Kielsen oqarpoq.

AAMMA ATUARUK Overblik: Status på coronavirus

Timmisartuussinerulli matunera napparsimasunut Danmarkimut katsortikkiartortariaqartunut sunniuteqarnavianngilaq.

- Tamanna pingaartipparput, nunatsinni timmisartut sumiiffinni assigiinngitsuniittut napparsimasunik ingerlassisinnaapput, Kim Kielsen oqarpoq.

Pisiniarfinnullu niuerniapiloortoqarnissaanik equutissianillu allanilluunniit nioqqutissanik pisiniapiloornissamik tamanna isumaqanngilaq. Assartuinerimmi ingerlatiinnarneqassapput, aamma illoqarfinnut nunaqarfinnullu ingerlaavartumik assartuisoqassaaq.

Atuarfiit matunissaat politikkikkut aalajangernerusoq

Tusagassiortunik ataasinngormat katersuutsitsisoqarmat, atuarfiit ammaannarnissaat nunatta nakorsaanerata erseqqissumik kaammattuutigaa.

Nunatsinni cononaviruseqartoq ataasiinnaammat atuarfeqarfinnik matusineq siunertaqarnavianngitsoq, nunatta nakorsaanerata ataasinngormat oqaatigaa.

- Suliniutit taakku pisariaqalernissaannut utaqqissukkallassavagut. Atuarfeqarfinnik paaqqinniffinnik matusineq atuartut sumiiffinnut ataatsimoortalerpata tuniluuttoqarneranik annikilliinavianngilaq, taamaammat nunatsinnut tunillatsissimasunik isertoqartitsinnginnissaq iliuuseqarfigissavarput, nakorsaaneq, Henrik L. Hansen ataasinngornermi oqarpoq.

Tamatuma kingorna partiit siulittaasui ataatsimiipput piumasaqaateqarlutillu: Atuarfiit matussapput. Piumasaqaat Tunillaassortunik nappaalasoqarneranut ataatsimiititaliarsuarmut saqqummiunneqarpoq taakkulu suliaq oqallisigaat. Tamatuma kingorna partiit siulittaasui ataatsimeeqqipput - tamannalu isumaqatigiinngissutip isumaqatigiissutigineqarneranik kinguneqarpoq, taamaalilluni nunatsinni meeqqat atuarfii tallimanngornermi ualikkumit sapaatini-akunnerni marlunni matoqqasussanngorlutik, Kim Kielsen oqarpoq.

Taama aalajangerneq aamma Naalakkersuisunit taperserneqartoq, Kielsen oqarpoq.

Nakorsaaneqarfiup nittartagaatigut coronavirus pillugu annerusumik paasisaqarit

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 10765
  Tunillanneqarsimasut
17
  Peqqisseqqittutut nalunaarutigineqartut 16
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Takuuk: nun.gl Nunatsinni Nakorsaaneqarfik
  Nutarterneqarpoq
  oktobarip 27-at 2020 nal. 10:45