Coronavirusimik tunillatsissimasut: Nuummi inuit marluk coronavirusimik tunillatsissimasut siumorneqartut

Inuit marluk coronavirusimik tunillatsissimasut ullumi siumorneqarput. Corona pillugu allattoqarfik tusagassiutinut ataasinngornermi unnukkut taama nalunaaruteqarpoq.  

Inuit marluk pineqartut nunatta avataanit nunatsinnut tikereersullu coronavirusimik tunillatsissimasut paasineqarpoq.

Inuit pineqartut tikereernermi kingorna angerlarsimaannarnissamik maleruaqqusat malissimagaat nalilerneqarpoq, nappaatillu Nuummi tuniluutilersimasinnaanissaanut aarlerinaateqarpallaanngitsutut corona pillugu allattoqarfiup nalilerpaa.

- Pissutsit qanoq innerannik oqartussat ilisimasaqarnerulernissaasa tungaannut Nuummi innuttaasut mianersornissaat kaammattuutigaarput. Tusatsiakkanillu innuttaasut siammarterinnginnissaat, pingaartumik inoqatinut attaveqaatitigut, kaammattuutigaarput, Corona pillugu allattoqarfiup oqaatigaa.

Tunillatsissimasunik marlunnik nassaartoqaqqinnera pissutaalluni innuttaasut ilaat misissortinnissamut attavigineqassapput. Toqqaannartumik attavigineqarumaarput.

- Innuttaasut sinneri misissortinnissamut inniminniinissamut tunuarsimaassasut kaammattuutigaarput. Covid-19-imik nappaateqarnermik takussutissaqaraanni peqqinnissaqarfik oqarasuaatitigut attavigineqassaaq, misissortittoqassanersorlu peqqinnissaqarfiup taava nalilissavaa, corona pillugu allattoqarfik oqarpoq.

Nunatsinni oqartussat coronavirusimik tunillatsissimasunik ullut aappassaat nassaarput. Inuit arfinillit coronavirusimik tunillatsissimasut Ilulissani sapaammi siumorneqarput. Inuit pineqartut tamarmik Kalaallit Nunaannut tikereernermi tunillatsissimasut paasineqarpoq.

Inuit katillugit 27-t coronavirusimik nunatsinni tunillatsissimasut maannamut siumorneqarnikuupput. 19-it peqqissereerput, arlaannaalluunniillu napparsimmavimmi unitsinneqarsimanani.