Coronavirusimik nunarsuaq tamakkerlugu tunillanneqarsimasut 28 millionit sinneraat
Coronavirusimik nunarsuaq tamakkerlugu tunillanneqarsimasut ullut sisamat kingulliit ingerlaneranni 1 millionit sinnerlugit amerlisimapput, maannalu 28 millionit sinnerlugit.
USA-mi ilisimatusarfiup Johns Hopkins Universityp tallimanngornerup unnuaani nalunaarsugaani tamanna takuneqarsinnaavoq.
Nappaatip nunarsuaq tamakkerlugu tunillaassuuttup nalaani toqusut katillugit ippassaq aamma 900.000-t sinnerpaat.
USA-mi, Brasiliami Indiamilu coronavirusimik tunillanneqarsimasut toqusullu amerlanerpaapput.
AAMMA ATUARUK Nunarsuaq tamakkerlugu coronavirusimik tunillatsissimasut 27 millioninngortut
USA-mi tunillanneqarsimasut amerlanerpaapput tamaani katillugit 6,4 millioningajaagamik, Indiami 4,5 millionit Brasiliamilu 4,2 millionit.
Nunarsuup immikkoortua ataatsimut isigalugu eqqorneqarnerpaaq tassaavoq Latinamerika, inuit 8 millionit sinnerlugit Latinamerikami tunillanneqarsimammata.
Coronavirusili Latinamerikami tunillaassuuppallaarunnaariartortoq kisitsisit takutikkaat, nutaarsiassaqartitsivik Reuters allappoq.