Coronavirusimik tunillatsissimasorpassuit siniffissaqarniassammata Kinami illoqarfiit ilaanni Wuhanimi coronavirusimik nappaalaffiusumi saqqummersitsivissuaq napparsimmavinngortinneqarallarpoq.Assi: AFP/Ritzau Scanpix

Coronavirusimik Kinami toqquteqartut maanna 565-iusut

Coronavirusimik Kinami tunillatsissimasut 28.000-t maanna sinnermagit, Kina napparsimmaviit siniffissaalatsinerat KInami oqartussaasunit aarlerisaarutigineqarpoq.

Nualluummik coronavirusimik Kinami toqquteqartut 565-inngorput. Tamanna uppernarsarneqarpoq, Kinami nunap immikkoortuani Hubeimi coronavirusimik nappaalaffiunerpaami inuit coronavirusimik toqquteqartut 70-inik amerlisimasut sisamanngornermi nalunaarutigineqarmata.

Kinami peqqissutsimut oqartussat taama nalunaaruteqarput.

Coronavirusi
- Coronavirusimik tunillatsissimasumik siumueqqaarneq siorna decembarip ulluisa arfineq-pingajuanni pivoq.

- Nualluut coronavirusi inunnit Kinami illoqarfiit ilaanni Wuhanimi aalisagaarniarfimmiissimasunit - coronavirusillu siaruaaffianiigunarsimasunit - tuniluutilerpoq.

- WHO-p coronavirusi nunarsuarmi peqqinnissakkut ajornartoorfiusutut 2020-mi januaarip ulluisa 30-anni nalunaarutigaa.

- Coronavirusi inummiit inummut attaveqarnikkut tuniluuttartoq nappaammut SARS-imut assersuunneqarpoq.

- Inuit coronavirusimik tunillatsissimasutut nalunaarsukkat 28.000-t sinnerpaat.

- Coronavirusip Kinami tuniluunnerata saniatigut nunanut allanut 28-nut ilaatigut Sverigemut siaruaassimasutut nalunaarsorneqarpoq.

- Inuit coronavirusimik toqquteqarsimasut 427-upput, taakkunani ataaseq Filippinerini toquvoq, sinnerilu 426-usut Kinami toqullutik.

- Qallunaat qulit Hubeimiit coronaviruseqarfiusumiit Danmarkimut qimagussorneqarput. Qimagussorneqartuni marluk tunillatsissimanermut ilimanaateqartutut nalilerneqarmata angerlarsimaffimminnit aneqqusaajunnaarallartitaapput.

Paasissutissanik pissarsiffik: Statens Serum Institut, Det Europæiske Center for Sygdomsforebyggelse og -kontrol, DR

Kinami tamarmi coronavirusimik tunillatsissimasut  nalunaaquttap akunneri 24-t kingulliit ngerlaneranni 3694-inut amerlisut uppernarsarneqarpoq.

Kinami tunillatsissimasut 28.000-usut

Taamaalilluni Kinami inuit 28.000-inik sinneqartut nualluummik coronavirusimik toqqutaasinnaasumik tunillatsissimasut uppernarsarneqarpoq.

Coronavirusimik tunillatsisimasunut ilaavoq inoorlaaq, inunngornerminit akunnerit 30-it qaanngiummata tunillatsissimasoq paasineqarmat.

Nutaarsiassaqartitsivik AFP taama allaaserisaqarpoq.

Nappaalaneq nunarsuarmi peqqissutsikkut ajornartoorfiusutut nunat tamalaat akornanni peqqinnissaq pillugu suliniaqatigiiffimit, WHO-mit, nalilerneqartoq, Wuhanimi tuniniaaviit ilaanniit decembarip qiteqqunnerani tuniluutilerpoq.

Tuniniaavik taanna uumasunik anngiortumik ilaatigut tuniniaaviuvoq.

Kina siniffissaalatsisoq

Kinami napparsimmaviit coronavirusimik tunillatsissimasunik amerligaluttuinnartunik nakorsaanermut pisariaqartitaminnik siniffissaalatseqisut atortussaalatseqisullu, Kinami oqartussat sisamanngornermi aarlerisaarutigaat.

Sukkanerpaamik napparsimmaviliortoqaraluartoq pisortallu illuutaat napparsimasunut uninngavinngortinneqaraluartut siniffissaalatseqisut, Wuhanimi atorfilittat ilaata, Hu Lishanip, aarlerisaarutigaat.

Taamaattumik Wuhanimi oqartussat akunnittarfinnik atuarfinnillu peqqissaavinngortinneqarallartussanik ujaasileruttortut, atorfilittap ilanngullugu oqaatigaa.

Nutaamik ulluni arfineq-pingasuni napparsimmaviliortut

Wuhanimi napparsimmavittaaq Huoshenshan napparsimasunit 1000-nit uninngaviusinnaasoq ullut arfineq-pingasuinnaat ingerlaneranni naammassillugu sananeqarpoq.

Coronavirusip tuniluunnerata ilutigisaanik Kinami nunap immikkoortuani Hubeimi napparsimmaviit maanna sulisussaaleqeqisut nammakkersorpallaarneqaqisullu, amerikamiut aviisiata The Washington Postip siusinnerusukkut allaaseraa.

Tamanna ilutigalugu napparsimmavippaaluit nakorsaatinik amigaateqalersimanerarput.

The Washington Post naapertorlugu napparsimmavinni sulisut perusuersariartornissaminnut piffissaqannginnertik pissutigalugu nangeqarlutik sulisarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat