Coronavirusi: Sapaatit akunneri marluk nutaanik nassaartoqarani

Coronavirusimut misiliutit nutaat 21-t ullumi akissutersineqarput. Tamarmillu negativiusut paasineqarput, taamaalilluni nunatsinni nappaammik tunillatsissimasunik nutaanik sapaatit akunnerini marlunni nassaartoqanngilaq.
Coronavirusimut misiliutit Danmarkimut nassiutissaarlugit Nuummi misissorneqartalerput. Aajuna maskiina coronavirusimut misissuisinnaasoq. Assi © : KNR
Allattoq Ane-Marie Petersen, Jens Betak
apriilip 18-at 2020 16:44

Inuit katillugit 1101-t maanna misissorneqareersimalerput, taakkualu amerlanerpaartaat Nuummiillutik.

Coronavirusimik sapaatit akunnerini marluk ingerlanerini tunillatsittoqarsimanngippat nunarput arriitsumik ammariartoqqinneqalissasoq oqartussat nalunaarutiginikuuaat.

AAMMA ATUARUK Coronavirusi pillugu Nuummi misissorneqarsinnalerputit: Alakkarit

Tamannalu maanna aallartereerpoq. Sapaatit akunneranimi uani sineriammi meeqqat atuarfii ammarneqarput, Nuummi pingasunngorpat meeqqat atuarfiit aamma ammaqqissallutik. Atuartitsinerit aggulunneqarput, tassa meeqqat minnerit ullaakkut atuartinneqartarput annerillu ualikkut. Taamaalilluni meeqqat atuarfiini amerlavallaannginnissaq anguniarneqarluni.

Killilersuinernut tunngatillugu allannguinerit Naalakkersuisut sapaatit akunnera tulliani saqqummiutissavaat.

Nunatsinnit nunatsinnullu suli angalasoqaqqusaanngilaq, tamannalu apriilip 30-at ilanngullugu atuutissaaq.

Nunatta iluani angalaneq maajip aallaqqaataanit ammaqqissaaq.

AAMMA ATUARUK Nakorsaaneq corona pillugu: Nunarput immikkuullarissumik inissippoq

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq