Aajuna maskiina coronavirusimut misissuisinnaasoq. Assi: KNR

Coronavirusi pillugu Nuummi misissorneqarsinnalerputit: Alakkarit

Nualluummut coronavirusimut misissugassat Statens Serum Institutimut Københavnimiittumut nassiunneqartarunnaassapput.

- Tamaani misissuisinnaanngornerput qujanartorujussuuvoq. Uagutsinnuinnaanngitsoq aamma misissortittunut, sukkanerusumimmi misissortissinnaanngormata, Dronning Ingridip Napparsimmavissuani bioanalytikeri Inge Lise Kleist oqarpoq.

AAMMA ATUARUK Corona: Savalimmiormiut suliffeqarfiutaata maskiina misissuut Nuummut nassiukkaa

Inuit coronavirusimik tunillatsissimanersut Nuummi akissutissarsisinnaalerput.

Tamanna siuariarnerujussuuvoq. Tassami nunatsinnit misissugassatut tigusat Statens Serum Institutimut Danmarkimiittumut nassiunneqartaraluarput.

Tassami innuttaasut ullut marluk tikillugit COVID-19-imut misiligutit inerneri utaqqisarsimavaat.

- Misissugassanik nassiussisarunnaarnerput isumaqartorujussuuvoq. Akisugami maanngaanniillu misissukkat nassiunnissaat ajornaqaluni. Sila timmisartuussinerillu apeqqutaaqigamik, Inge Lise Kleist oqarpoq.

Ilanngutassiaq assip ataani nangippoq..

- Maani misissugassatut tigusaq viruseqarnersoq misissortarparput. Misissuiffimmilu uani misissugassat misissuummik akuneqartarput, Amplexa Geneticsimi teknikkeqarnermut pisortaq, Hans Atli Dahl oqarpoq.

Laboratoriamut tunngatillugu paasissutissat:

 

- Misissugassanik amerlasuunik suliaqarfiusinnaavoq pisariaqartinneqartunillu naammassisaqarsinnaanera naatsorsuutigineqarluni.

- Suliaq immikkut ilisimasallit marluk Dronning Ingridip Napparsimmavissuani laboratoriameersut suleqatigalugit suliarineqarpoq.

- Immikkut ilisimasallit atortussat pisariaqartinneqartut nassarpaat.

- Laboratoriap maannamuugallartoq qaammatini marlunni ingerlanneqarallarnissaa isumaqatigiissutaavoq.

 

Najoqqutaq: Naalakkersuisut

Namminersorlutik Oqartussat savalimmiormiut suliffeqarfiutaannut, Amplexa Geneticsimut Danmarkimiittumut atortorissaarut misissuissutaasinnaasoq pillugu isumaqatigiissuteqarput.

Ullormut 100-150-inut amerlatigisut

Maskiinap misissugassat akissutersineqartussat 100-init 150-inut amerlassusillit ullormut misissorsinnaassavai, maskiinarlu taanna Namminersorlutik Oqartussanut ulluni 30-niugallartumi atukkiunneqarpoq.

Piffissami tassani misissorneqartut 3000-init 3500-inut akissutersineqarsinnaassapput.

Misissuisarneq maskiinap nutaap sukkallisingaatsiaraa, Hans Atli Dahl oqarpoq.

- Misissukkat ukua ulloqeqqata missaani maanga eqqunneqarput, sisamallu tallimalluunniit missaani piariissavagut, Hans Atli Dahl oqarpoq.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 7751
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 24-at 2020 nal. 10:45