Coronavirus pillugu meeqqanut erinarsuut: Eqitaaqqikutsooqqikkumaarpugut
Talinnut quersorit. Assannut spritti atoruk. Assatit asakkit. Qanillinaversaarit. Siunnersuutit arlaleriaq tusareersimagunarpatit.
- Manna tikillugu inersimasut kisiisa paasissutissittarpagut, tamannalu ajorluinnarpoq, Kommuneqarfik Sermersuumi borgmesteri suliniummullu isumassarsisoq Charlotte Ludvigsen oqarpoq.
Ilanngutassiaq assip ataani nangippoq..
Taamaammat Kommuneqarfik Sermersooq equmiitsuliortut Frederik Elsner, Kimmernaq Kjeldsen, Josef Tarrak Petrussen Hinnarillu suleqatigalugit nualluut siammatsaliorniarlugu meeqqanut erinarsuummik saqqummersitsivoq.
Eqqumiitsuliortut peqatigiillutik erinarsuut "Eqitaaqqikutsooqqikkumaarpugut" suliarivaat, taannalu ataasinngormat marsip 23-ani saqqummerpoq.
Frederik Elsner erinarsuummut erinniortuuvoq Kimmernaq Kjeldsenilu taalliortuulluni.
Suliaq nuanneq
- Suliassiissutigineqartoq nuannerpoq. Meeqqanut nipilersuummik suliaqarneq inuunermut kajumissinartuaannarpoq. Erinarsuutip takutippaa eqqumiitsuliornerup nalaataqarnermi aamma pingaaruteqarnera, Frederik Elsner oqarpoq.
Erinarsuut aamma allatigut atorluarneqarsinnaavoq.
- Assersuutigalugu erinarsuummi uteqattaartagaq 20 sekundtinik sivisussuseqarpoq, taamaalillunilu erinarsuutigaluni assat innersuussutigineqartutut asanneqarsinnaallutik, Frederik oqarpoq.
Isumassarsiaq borgmesterip allaffiani pinngorpoq. Nukarlersatta pisup ilungersunarneranik qanoq paasinnitsinneqarnissaat borgmesterip Charlotte Ludvigsenip isumassarsiarimmagu.
- Erinarsortartutta pikkorissut musikvideoliaat assorsuaq nuannaarutigivara, siunnersuutit pitsaasut meeqqat naligalugit, nuannersumik paasiuminartumillu saqqummiummatigit, Charlotte Ludvigsen oqarpoq.
Erinarsuutip musikvideoa Josef Tarrak Petrussenip suliaraa.
Ilanngutassiaq videop ataani nangippoq..
Assakka panertupilussuupput
Erinarsuut arfinilinnik ukiulinnut Qillaq Steenholdt Petersenimut Erneeraq Larsenimullu eqqarsalersitsivoq.
- Nuanneq. Sumut tamaangagooq qitserarnata, Qillaq Steenholdt Petersen oqarpoq. Taassumalu ikinngutaata Erneeraq Larsenip isumaqatigaa.
- Immitsinnut tunillannginniassagatta sumut tamaanga qitserassanngilagut. Aamma assagut asakulassavagut, Erneeraq oqarpoq.
- Uanga assakka asattaqattaangaarakkit panertupilussuupput, Qillaq oqarpoq.
