Inuk Hostels ulapaarfimmi, soorlu aasakkut, aqqanilinnik sulisoqartaraluarput, ukioq mannali ikinneroratarsinnaapput.

Coronavirus: Inuk Hostelip millionip affaa annaareerpaa

Nuummi atisaarniarfiit, neriniartarfiit assigisaallu maanna matoqqapput. Namminersorlutillu inuussutissarsiortunut tamanna isertitatigut annaasaqarfiungaatsiartussanngorpoq.

Nuuk ulluni marlunngortuni mattoqqavoq, illoqarfillu unittoorluni.

Pisiniarfiit, neriniartarfiit, nujaleriviit allallu ulapaarfiusaraluartut apriilip arfineq-pingajuata tungaanut matoqqassapput.

Nuuk matoqqavoq
 
  • Inuit amerlanerpaamik qulit ataatsimoorsinnaapput. Tamanna illup iluani silamilu atuuppoq.
  • Inerteqquteqarneq pisortat ilaasartaataannut atuutinngilaq. Bussini issiavissat tamarmik atorneqarsinnaapput. Aamma pisiniarfinni inuit qulinit amerlanerusinnaapput.
  • Ilinniarfeqarfiit ulluuneranilu paaqqinniffiit matupput. Atuarfiit tallimanngorpat aatsaat matusussaagaluarput – matusinerli ullumikkut sisamanit aallartissaaq.
  • Nuuk Centeri matuvoq.
  • Qitigiartarfiit imerniartarfiillu matupput.
  • Neriniartarfiit aamma neriartortunut matoqqassapput. Taakkuli annissanik pisiniarfigineqarsinnaanissaat periarfissaassaaq.
  • Timersortarfiit - matumani timigissartarfiit ilanngullugit matupput.
  • Nuummiit aamma aallarsinnaanngilatit – aamma nammineq umiatsiannik. Aqisserniarsinnaavutit aalisariarsinnaallutillu – kisianni Nuummut angerlaqqittassaatit. Sumiiffinnut allamukaqqusaanngilluinnarputit.
  • Pisiniarfiit ammaannassapput – pisinialli imminnut 2 meterinik ungasitsigisassapput.

- Apersortittoortussat tassa maannakkut soorunami piareersaleraluarput, kisianni soorunami taakku unipput. Qaammatip tulliani ammaqqikkutta soorunami pisiniat marloriaammik pisiortornavianngillat, atisaarniarfimmik Tingomik piginnittoq Elvira Knudsen Heilmann oqarpoq.

Taanna ataatsimik sulisoqarpoq, sulinertillu sapinngisamik ingerlatiinnarpaat.

Atisanik tuniniakkaminik Facebookimi saqqummiisaqattaarput,  pisisartumik puigunnginniassammatik.

AAMMA ATUARUK Coronavirus: Arctic Circle Business millionerpassuarnik annaasaqarpoq

Neriniartarfik unnuisarfiutigisoq Inuk Hostels Nuup matuneqarneranit aamma eqqugaavoq. Matoqqaqqusinerlu sivitsorneqassappat taakku sulisuminnik ikilisaasariaqalissapput.

- Soorunami sulisutigut ikilisaasariaqarpugut. Taamaaliornerlu sulisutsinnut toqqissisimananngilaq, Inuk Hostelsip pisortaa Maren-Louise Poulsen Kristensen oqarpoq.

Taakku ulapaarfimmi, soorlu aasakkut, aqqanilinnik sulisoqartaraluarput, ukioq mannali ikinneroratarsinnaapput.

Sulisut akunnermusiallit ikilisaanermik eqqugaanerpaassasut Inuk Holstelsip pisortaa oqarpoq. Taakkumi suliassaqanngikkunik sulisinnaanngillat.

Inuussutissarsiortunut ikiorsiissutit ilusilersorneqarput

Tingop piginnittuata Elvira Knudsen Heilmannip isertitassaraluani akigalugit sulisuni aningaasarsissasoq aalajangiussimavaa.

- Qaammatip tulliani soorunami akissarsiaqassanngilanga, pingaarnerugami sulisuma pinngitsoorani isertitaqarnissaa.

Naalakkersuisut inussutissarsiortunut ikiorsiinissartik maanna ilusilersuileruttorpaat. Namminersortullu taakkununnga ima oqariartuuteqarput:

- Neriuppunga eqqaamassagaatigut (Naalakkersuisut aaqq.), uku pisiniarfiit atisaarniarfiillu mikinerusut. Uku anginerusut kisiisa eqqarsaatiginagit.

- Uagut namminersortuusugut tapiiffigineqanngisaannarnikuusugut pisariaqatsitsilissagutta neriuutigisorujussuuara puiussanngikkaatigut. Ilimagaara pisariaqartitsilissasugut, Elvira Knudsen Heilmann oqarpoq.

AAMMA ATUARUK Nuummi inerteqqutit nutaat: 1500 koruunimik akiligassinneqarsinnaavutit

Inuk Hostelsip isertitassaraluaminnit maajip qaammataa ilanngullugu millionip affaa annaareersimavaa.

- Aarlerinartorujussuuvoq. Isertitaarukkuttami qanoq ililluta akiligassat akilissagatsigit? Maren-Louise Poulsen Kristensen aperivoq.

Naalakkersuisut inussutissarsiortunut ikiorsiinissaminut pilersaarutertik ulluni qaninnerni saqqummiutissallugu ilimasaarereerput.

Isummersuutit