Coronartoq napparsimmavissuarmi suli uninngasoq

- Napparsimasoq alla aamma ullumi unissinnaasoq misissorparput, nakorsaaneq oqarpoq.
Napparsimmavissuarmi uninngasup uninngaannarallarnissani pisariaqartippaa.
Allattoq Mathies Hvid Toft, Andreas Wille
juunip 13-at 2021 15:02

Coronavirusimik napparsimasoq Dronning Ingridip Napparsimmavissuani uninngasoq maanna ataasiinnaavoq, taannali kisimiikkunnaarluni uninngasut ullumi marlunngoriaannaasut, nunatta nakorsaanera, Henrik L. Hansen KNR-imut oqarpoq.

Napparsimalluni unittoq siulleq maanna ajunngitsoq peqqisseqqinnissaalu ilimanartoq kisiannili napparsimmavissuarmi uninngajunnaarnissaminut suli napparsimavallaartoq nunatta nakorsaanera Henrik L. Hansen oqarpoq.

- Peqqissusaa ajunngilaq, aalaakkaavoq. Tamannalu covid-mik tunillatsereernermi taamaassinnaanera ilimagineqassaaq, Henrik L. Hansen KNR-mut oqarpoq. 

AAMMA ATUARUK Coronamik tunillatsissimasoq Nuummi napparsimmavimmut unitsinneqartoq

Taassuma saniatigut napparsimasoq alla ullumi sanamukarpoq, taanna misissortissaaq napparsimmavissuarmullu unissanersoq angerlaannassanersorluunniit misissuinermi paasiniarneqassaaq.

- Ullumi napparsimasoq alla misissorparput, tamassumalu ajoraluartumik takutippaa inuit ilaasa covid 19-mik tunillatsissimanertik ilungersunarnerusumik atortaraat, Henrik L. Hansen oqarpoq.

Kalaallit Nunaanni 44-it coronamik tunillatsinnikuupput, taakkunannga sisamat suli napparsimapput.

 

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq