Saamerleq Bolette Maqe Nielsen Tanbreezimi siulittaasoq aamma talerpilleq Greg Barnes Tanbreezimi pisortaaneq.Assi: Malik Brøns / KNR

Coronap Tanbreez kinguaattoortippaa - kisianni pisortaaneq maanna Nunatsinniippoq

Amerikamiut Kuannersuit eqqaani aatsitassarsiorfimmi allami aatsitassarsiornissaminnut soqutiginnipput. Kisianni coronap aatsitassarsiornissamut pilersaarutaat kinguaattoorteqqavai.

Aatsitassarsiutileqatigiiffik Tanbreez piiaanissamut akuersissuteqarfiuvoq. Suliffeqarfik ukioq ataaseq matuma siorna akuersissutinnappoq.

Tanbreezili Killavaat Alannguanni aatsitassanik qaqutigoortunik piiaalluni aallartinnissamut arlalinnik amigaateqarpoq.

Aatsitassarsiutileqatigiiffik aappaagu ukiup naanissaanut piiaanissamut matusinissamullu pilersaarummik Naalakkersuisunut nassiussinissamut periarfissaqarput.

Aamma aningaasaliinermut isumaqatigiissutit amigaatigaat.

Tanbreezip Qaqortup eqqaani aatsitassarsiulersaarnera

 

  • Tanbreez Kujataani Killavaat Alannguanni nunaminertami 18 kvadratkilometerisut annertutigisumi aatsitassarsiornissamut akuersissuteqarpoq.
  • Aatsitassarsioqatigiiffik, Tanbreez, saffiugassamik qaqutigoortumik eudialytimik piiaassaaq.
  • Aatsitassarsiorfimmi ujaqqerivik saffiugassiassamik ukiumut 500.000 tonsimik piiaaffiusassaaq.
  • Ukiuni 30-ni piiaanissamut akuersissuteqarpoq.

Tusarfik: Naalakkersuisut / Kommune Kujalleq

Australiamiut suliffeqarfiutaata Tanbreezip pisortaata, Greg Barnesip corona suliniummut akornutaasimasoq oqaatigaa.

Greg Barnes coronamut killilersuinerit pissutigalugu Australiamit qaammatini 18-ini aallarsinnaanngilaq.

Australia coronap nunarsuaq tamakkerlugu tunillaassuutilernerani sukannerluinnartunik suliniuteqalerpoq.

Australiami naalakkersuisut nunamut killeqarfiit 2020-mi marsimi matuaat. Tamatuma inuit killilimmik amerlassuseqartut nunamit aallarnissamut akuersissuteqarfiupput. Tamanna ilaatigut pissutigalugu Tanbreezip suliniumminut tunngatillugu niuernermik suliaqartunik naapitsiniarneq unammillernartippaa.

Australiamiulli ministeriunerata inuit Greg Barnesillu aallarsinnaaleqqinnerat akuersissutigaa.

- Covidimik taaguuteqartoq pissutigalugu ukiup affaanik annaasaqarpugut, tamanna kinguartitsilaarpoq, suliaqarnermik aappaagumit aallartissinnaanissarput naatsorsuutigaara. Kisianni covid-imut atatillugu allanilu susoqarnera apeqqutaalluinnarpoq. Iluarsiartortoqarpasilerpoq, Greg Barnes oqarpoq.

Aatsitassat qaqutigoortut maanna uliaavoq nutaaq. EU-p biilit innaallagiatortut anorisaatillu pissarsiarerusuppai. USA Kinap avataatigut allanik pisiortorfissanik aamma amigaateqarpoq. Taamaammat Tanbreezip aallartinnissani neriuutigaa.

- Sukkasuumik ingerlatsisinnaassalluta neriuutigaarput. Inuit aatsitassanik qaqutigoortunik maannakkut kissaateqarput, taamaammat inuit aatsitassanik qaqutigoortunik kissaateqarnerani sukkasuumik iliuuseqartoqassaaq. Suliassaq annertoqaaq tamanullu atorfinitsitsisoqassalluni. Amerlasuulli inissinneqareerput, Greg Barnes oqarpoq.

USA-mit EU-millu piumaneqartut

USA-mimi aatsitassanik qaqutigoortunik ujaasineq annertusineqarpoq. Kina piffissami matumani tassani nioqquteqarfiuvoq. USA-lli aatsitassat qaqutigoortut taamaallaat Kinamit pissarsiarisinnaarusunngilai, taamaammat periarfissanik nutaanik ujartuerusuppoq.

Amerikamiut præsidenterisimasaat, Donald Trump USA-p Kinamit aatsitassanik qaqutigoortunik Kinamit pissarsinissamik isumalluuteqarnermik annikillisaanissamut peqqussummik siorna atsiugaqarpoq.  Tassalu USA nammineq ujaasillunilu aatsitassanik qaqutigoortunik nioqqutissiulissasoq.

USA-p nioqqutissat taakku 80 procentii Kinamit toqqaannartumik pissarsiarisarpai, sinnerilu nunanit allanit Kina toqqaannanngitsumik aqqutigalugu pissarsiarisarlugit.

Maanna præsidentiusup, Joe Bidenip amerikamiut amerlanerusut biilinik innaallagiatortunik 2030-mi atuilernissaannik aamma anguniagaqarpoq. Biilit innaallagiatortut aatsitassat qaqutigoortut atorlugit nioqqutissiarineqartarput. Bidenip angorusutaanik eqquutsitsinissamut USA-p aatsitassat qaqutigoortut pissarsiarisartagaasa quleriaataannik amerlanerunissaat pisariaqartoq nalilerneqarnikuuvoq.

Tamatuma saniatigut aatsitassat qaqutigoortut EU-p aatsitassatut pissarsiariuminaatsututut allattorsimaffianniipput. Allattorsimaffik taanna nioqqutissiortut nioqquteqarfiillu taakkuninnga ukkatarinninnissaannut tunngavoq.

Taamaammat Qaqortup eqqaani qaqqaq Tanbreezilu nunanut amerlasuunut soqutiginaateqarput.

- Taanna nunarsuarmi aatsitassani qaqutigoortuni oqimaannerpaagunarpoq. Aatsitassat oqimaatsut qaqutigoortut pingaartumik kajungerisartut qaqutigoortut Terbium aamma Dysprosium inunnit ujarneqarusulluinnarput.

- Taakku biilinut innaallagiatortunut, anorisaatinut, qarasaasianut imaluunniit sakkutuut pisariaqartitaannut tamanut atorneqartarput.

Greg Barnesip arlalinnit neqeroorfigineqareersimalluni oqaatigaa.

- Kinamit, Indiamit USA-miillu neqeroortoqarpoq. Taakku pisiariumannittuullutillu aningaasaliinissamut neqerooruteqartuupput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat