Coronap nalaani: Aggustimi Qooqqut Festivalertoqassaaq

Tusarnaartitsininerit, immiaaqqanik ataasinnguartornerit tinguaqqallu qillertuusarmiut aasaq manna isigimmersuinnarsinnaavagut – nunarsuarmimi tamarmi festivalertitsinissarpassuugaluit taamaatinneqarput. 

Ilaqutariinnulli Qooqquni Nuup Kangerluata ilaaniittumi festivalertitsinissaq taamaatinneqanngilaq. Kulturip Illorsua Katuaq, Qooqquni aggustip ulluisa 14-ianni 15-iannilu festivalertitsisussaq, taama ilisimatitsivoq. 

- Qilanaaqaagut festivalilu piareersarlugu massakkut ulapputigaarput. Pisortat maleqqusaat tamaasa malillugit aaqqissuussivugut, maleqqusanut malinnaavugut pisoqarneranilu aamma peqqussutit malitassaasut aallaavigalugit aaqqissuussaq piareersarparput, Katuami aaqqissuusinermi pisortaq Camilla Høg oqarpoq.

Katuaq Qooqqut Nuan suleqatigalugu festivalimik aaqqissuussivoq. Festivali tallimanngornermi aggustip ulluisa 14-ianni unnukkut ammarpat nipilersortoqassaaq. Aqaguanilu arfininngornermi aggustip ulluisa 15-ianni pikkorissaanerit allallu aliikkusersuinerit ullukkut pissapput, unnukkullu nipilersortoqassalluni. 

Ilaatigut Small Time Giants, Îsâvaraq Petrussen Ernerilu, Laura Aviana aamma Gerth Lyberth appisimaassapput.
Sanalunneq, qilaatersorneq, eqqarsaqqissaarneq (meditation) yogalu aliikkutarineqarsinnaassapput, kalaallillu filmiliaat qiaammisaarnartuliat iginnaarneqarsinnaallutillu ikumatitap eqqaani appisimaartoqarsinnaassaaq. 

Festivalimi peqataaneq akeqanngilaq – peqataarusuttulli tamarmik festivalimut peqataanissamut bilitseqartariaqarput. Pisortat katersuunnermut maleqqusaat malittussaagatsigit peqatariaqarput.

Bilitsinik akeqanngitsunik Katuamut aggustip ulluisa sisamaanniit aallertoqarsinnaanngussaaq.