Danmarkimi inuit marluk coronavirusip allannguutaanik Omikronimik tunillanneqarsimasutut paasineqartut, Danmarkimi peqqissutsimut aqutsisoqarfiup uppernarsarpaa.Assi: Eva Plevier / Ritzau Scanpix

Coronap allannguutaa Omikron Danmarkimi inunni marlunni nassaarineqarpoq

Danmarkimi inuit marluk coronavirusip allannguutaanik Omikronimik tunillanneqarsimasutut paasineqarput.

Inuit marluk taakku Sydafrikamit Danmarkimut tikinnerminni misissortissimapput.

Naalagaaffiup Nappaatinik Nakkutilliisoqarfia Statens Serum Institut tusagassiutinut taama allappoq.

Coronavirusip allannguutaa taanna nunani tamalaani ernumalersitsivoq, coronavirusimmi allannguutaanut Deltamut, nunani tamalaani maanna takussaanerusumut, naleqqiullugu tuniluutianerusutut isikkoqarmat.

AAMMA ATUARUK Corona allaaneq nutaaq nunarsuatsinni tamani isumaaluutigineqarpoq

Sydafrikamit Danmarkimut tikittut marluk taakku angerlarsimaffimmi maanna mattusimapput.

Nunat killeqarfitik matugallaraat

Coronavirusip allannguutaa Omikron Afrikap kujasissortaani siullerpaamik nassaarineqarpoq, nunanili assigiinngitsuni kingorna aamma siumorneqarluni, soorlu Tuluit Nunaanni, Hollandimi Belgiamilu. Nunat arlallit killeqarfitik nunanut Afrikameersunut arlalinnut tamanna pillugu maanna matugallarpaat.

Coronavirusip allannguutaanik Omikronimik siusinnerusukkut tunillatsissimasunik Danmarkimi peqarnersoq Naalagaaffiup Nappaatinik Nakkutilliisoqarfiata Statens Serum Insitutip paasinialeruttorpaa.

Inuit ulluni kingullerni qulini angalasimasut, PCR-testimillu misissortinnermi tunillatsissimasutut paasineqartut virusip allannguutaanik Omikronimik tunillatsissimanersut paasiniarneqarpoq.

AAMMA ATUARUK Island strammer rejseregler for passagerer fra Grønland

Coronavirusip allanngutaa Omikron nutaajummat taanna pillugu paasissutissat killeqarput. Assersuutigalugu coronavirusimut maanna siaruaannikumut naleqqiullugu allatut ersiuteqartarnersoq suli ilisimaneqanngilaq.

Assigiinngitsorpassuarnilli allannguuteqarpoq, assersuutigalugu akiuussutissat maanna atorneqartut sunniutaannut immaqa innarliisinnaalluni.

Tunillatsissimasut qanigisaat allallu, Napparsimasut Isumannaatsuunissaat pillugu Danmarkimi aqutsisoqarfiup ujartuleruttorpaat, taakkualu mattusimanissamik aamma kaammattorneqarlutik.

Coronavirusip allannguutaa Omikron nutaajummat ernumanartutullu maanna nalilerneqarallarmat, tunillatsissimasut qanillisimasaat, taakkualu qanillisimasaat ujartorneqaleruttorput, taakkualu aamma mattusimatinnissamik kaammattorneqarlutik.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl