Aningaasaqarnermut Siunnersuisoqatigiit siulittaasuata tullia nunatta aningaasaqarnerata killiffianik naliliineq kingulleq pillugu ataasinngormat saqqummiivoq.Assi: KNR

Coronap ajornartoortitsinera sipaarniuteqartariaqarnermik kinguneqartoq

Naalakkersuisut coronap ajornartoortitsinerani aningaasartuutinut matussusiissutissanik ujaasisariaqartut nunatsinnilu utoqqaat amerliartornerat eqqarsaatigalugu aningaasaqarnermut politikki allanngortittariaqaraat, Aningaasaqarnermut Siunnersuisoqatigiit naliliipput.

Ikiorsiissuteqarneq, pisarialimmik timmisartuussineq, peqqinnissaqarfimmut aningaasartuuteqarneruneq, akileraarutinit isertitakinneruneq aamma Namminersorlutik Oqartussat suliffeqarfiutaannit isertitakinneruneq.

Aningaasanik annaasaqarfiusut amerlapput, tamannalu akisoqaaq.

Aningaasaqarnermut Siunnersuisoqatigiit

Aningaasaqarnermut Siunnersuisoqatigiit ukiut tamaasa ukiumoortumik nalunaarusiortarput.

Nunatta aningaasaqarnerata killiaffia misissoqqissaartarpaat. Aningaasaqarnermut politikki arlaannulluunniit attuumassuteqaratik  misissoqqissaartarpaat. 

Nunatsinni nioqqutissaliorneq, nioqqutissanik piumasaqarneq suliffeqarnerlu pillugit aamma naliliisarput.

550 millionit koruunit ukioq manna aningaasartuutaapput, tamatumalu saniatigut Naalakkersuisut 2021-mi aningaasanut inatsissaq 183 millionit koruuninik amigartooruteqarfiussasoq ilimagaat.

AAMMA ATUARUK Vittus Qujaukitsoq: Aappaagu amigartooruteqarnissaq pinngitsoortinneqarsinnaanngilaq

Nunatsinnilu utoqqaat amerliartuinnarput, tamannalu pisortat suliffeqarfiutaannut ilungersunarpoq. Tassa imaappoq, Naalakkersuisut aningaasaqarnikkut imaannaanngeqisunik aalajangigassaqartut, Aningaasaqarnermut Siunnersuisoqatigiiit naliliipput.

- Ukioq manna amigartooruteqarujussuassagutta aappaagulu ilimanaqisumik amigartooruteqangaatsiassagutta, taakku matussusertariaqarpavut.

- Taamaammat aningaasaqarnermut politikki piumsaqarfiusorujussuussaaq, pisortat aningaasartuutaannik killilersuinermik ataatsimullu isigalugu sipaarniuteqarnermik siunissaq ungasissoq isigalugu kinguneqartariaqarluni, Aningaasaqarnermut Siunnersuisoqatigiit siulittaasuat Torben M. Andersen oqarpoq.

Aningaasaqarnermut nutaamik pilersaarusiornissaat pisariaqaqisoq

Aningaasaqarnermut Siunnersuisoqatigiit nunatta aningaasaqarneranik alaatsinaaqqissaarnissaq aningaasanullu politikkimik atuuttumik ataavartumik naliliisarnissaq suliassaraat.

Aningaasaqarnermut Siunnersuisoqatigiit ukiumoortumik nalunaarusiartik ataasinngormat saqqummiuppaat. Nunatta aningaasaqarnerata killiffianik nalunaarusiaminni naliliipput, Naalakkersuisullu siunissaq ungasissoq isigalugu aningaasaqarnermut nutaamik pilersaarusiortariaqartut erseqqissumik aamma nalunaarutigalugu.

- Taamaaliunngippata aningaasartuutit isertitanit malunnaqisumik amerlanerulissapput, nunatsinnimi utoqqaat amerliartormata. Tamanna Namminersorlutik Oqartussat kommunillu isertitaqarnerunatik aningaasartuuteqarnerulernerannilli k kinguneqassaaq. Tamannalu amigartooruteqarnermik kinguneqassaaq, Torben M. Andersen oqarpoq.

AAMMA ATUARUK Aningaasanut inatsisissap amigartooruteqarfiunnginnissaa ataatsimiititaliap piumasaraa

Inuit Ataqatigiit Partii Naleqqallu Naalakkersuisut aningaasanut inatsisissatut siunnersuutaat 183 millionit koruuninik amigartooruteqarfiussangatitaat isornartorsiorpaat, Aningaasaqarnermut Siunnersuisoqatigiilli isornartorsiunermut isumaqataanngillat.

Sipaarniuteqarnissamik siunnersuigaluarlutik nunatta pisut eqqarsaatigalugit amigartooruteqassangatinneqarnera pissusissamisoortoq, Aningaasaqarnermut Siunnersuisoqatigiit isumaqarput. Isumaqarpummi suliffeqarfiit taperserneqarnissaannut aningaasarsiornerullu unittuunnginnissaanut qulakkeerisooqataasinnaasoq.

2021-lli kingorna sipaarniuteqarnissamut aningaasaqarnermi sukkannersumik aqutsinissaq pisariaqarpoq, Naalakkersuisulli nunatsinni inuussutissarsiornerup coronamik ajornartoornermit ilimagisamit eqqugaarujussuarsimannginnera tuppallersaatigisinnaavaat.

Nunatsinnimi ukioq manna naammassisat nalingi tamakkiisut - BNP - ataatsimut isigalugit 2019-imi naammassisat nalingi tamakkiisut amerlaqatigissagaat, Aningaasaqarnermut Siunnersuisoqatigiit ilimagaat. Tassa imaappoq, nunarput nunani coronap ajornartoortitsineranit eqqugaannginnerpaanut ilaavoq.

Tusarfik: Kalaallit Nunaata aningaasaqarnera, Upernaaq 2020, Aningaasaqarnermut Siunnersuisoqatigiit.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 10353
  Tunillanneqarsimasut
17
  Peqqisseqqittutut nalunaarutigineqartut 16
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Takuuk: nun.gl Nunatsinni Nakorsaaneqarfik
  Nutarterneqarpoq
  oktobarip 23-at 2020 nal. 10:45