Coronamut killiffik pillugu nalunaaqutaq ataatsimut tusagassiortunik katersortitsisoqassasoq
Tunillatsissimasut nutaat aqqaneq-marluk ippassaq nalunaarutigineqarput, tunillatsissimasut taamaalillutik 50-iulerlutik – tunillatsissimasullu nunatsinni aatsaat taama amerlatigipput.
Naalakkersuisut tamanna pillugu nalunaaqutaq ataatsimut tusagassiortunik katersortitsissapput.
Tunillatsissimasut nutaat kingulliit arfinillit Aasianniipput, ataaseq Qasigiannguani, ataaseq Nuummi - Sisimiunilu sisamat ippassaq unnukkut aamma nalunaarutigineqarlutik.
Sisimiuni tunillatsissimasunit marluk ilaqutariipput, ataatsillu alla tunillassimallugu. Tunillatsissimasulli marluk allat oqartussat paasissutissaataat naapertorlugu imminnut qanillisimanngillat.
- Taamaammat Sisimiuni tunillatsissimasunik ilisimaneqanngitsunik arlalinnik peqarsimassasoq ilimanaateqarpoq, Naalakkersuisut ippassaq unnukkut allapput.
AAMMA ATUARUK Corona: Sisimiuni tunillatsissimasut nutaat sisamat
Tunillatsissimasoq ataaseq peqqinnissaqarfimmi sulisuuvoq. Taamaammat peqqinnissaqarfiup matui matuneqarput:
- Sisimiuni Covid-19-imik tunillatsisimasoqarnera peqqutaalluni matut parnaarneqarput, uninngasunullu pulaarsinnaaneq unitsinneqarallarluni, Sisimiuni peqqinnisaqarfik Facebookikkut nalunaaruteqarpoq.
Taamaammat nakorsiarlutit napparsimmaviliassaguit peqqinnissaqarfiup oqarasuaataanut 86 42 11-mut sianerlutik sulisunut isumaqatigiissuteqaqqaassaatit.
Nnunatsinnut timmisartumut ilaaqatigiittut
Tunillatsissimasunik nalunaarsuinerit arlaleriarluni 0-imiissimavoq - kisitsit taanna juulip aallaqqaataani aamma 0-imiippoq - tunillatsissimasulli tamatuma kingorna amerliartuinnalerput. Tuniluunneq Ilulissani, Nuummi Qaqortumilu aallartippoq - tunillatsissimasullu taakku tamarmik nunatsinnut Københavnimiit timmisartorsuarmut juulip ulluisa arfernanni marlunngornermi ilaaqatigiissimallutik.
Tamatuma kingunerisaanik killilersuinerit sukannersut tassa inuit amerlanerpaamik 20-oqqusaanerat kikkullu tamarmik tamanit ornigarneqartuni qanermut assiaquteqaqqusaanerat atuutilersinneqarput.
Malittarisassat taakku nunatsinni sumiiffinni amerlanerpaani arfininngornermat atorunnaarsinneqassapput. Taakkununngalu taarsiullugu tamakkiisumik akiuussuserneqarsimanermut uppernarsaat imaluunniit coronamik tunillatsissimannginnermut uppernarsaat sivisunerpaamik akunnernik 48-nik pisoqaassuseqartoq atorlugit neriniartarfimmut, timersortunut, imerniartarfinnut, atuakkanik atorniartarfimmut, filmertarfimmut allanullu aatsaat isertoqarsinnaalerpoq.
Pisiniarfimmut atuarfimmulluunniit iserniaraanni tunillatsissimannginnermut uppernarsaateqarnissaq tamakkiisumilluunniit kapitissimanissaq piumasaqaataanngilaq.
Aasianni, Upernavimmi Upernaviullu nunaqarfiini piffissami matumani aqunneqarsinnaanngitsumik tuniluuttoqarnera pissutigalugu malittarisassat atuutiinnarput.
