Coronamik tunillatsissimasut arfinillit peqqisseqqittut mittarfiliornerlu aallarteqqilersoq
Nunatsinni coronavirusimik tunillatsissimasutut uppernarsarneqarsimasunit qulingiluanit arfinillit peqqisseqqissimasutut ullaap tungaani nalunaarsorneqarput. Tamanna nakorsanerup, Henrik L. Hansenip KNR-imut oqaatigaa.
- Tunillatsissimasutut uppernarsarneqarsimasut piffissami sivitsortumi ersiuteqannginnerat pissutigalugu covid-19-imik tunillatsissimanerminnik qaangiisimasutut ullaap tungaani uppernarsarneqarput, nakorsaaneq oqarpoq.
Tunillatsissimasutut uppernarsarneqarsimasut sinneri pingasut ajunngillat napparsimmavimmiinnissaminnillu pisariaqartitsinatik.
Mittarfimmik sanaartorneq aallarteqqilersoq
Tamatuma saniatigut Tunillaassortunik nappaalanersuaqarneranut ataatsimiititaliarsuup Nuummi mittarfimmik sanaartornerup aallarteqqissinnaanissaanut malittarisassat nutaat sapaatip akunnerata naanerani ulapputigai.
- Tunillaassortunik nappaalanersuaqarneranut ataatsimiititaliarsuarmit ullumi kingusinnerusukkut nalunaaruteqarnissarput naatsorsuutigaarput, suliaqarneq taamaalilluni aalajangersakkat assigiinngitsut malillugit aallarteqqissinnaassalluni, Henrik L. Hansen oqarpoq.
AAMMA ATUARUK Mittarfiup eqqaani sanaartorfik iserfigineqaranilu aniffioqqusaajunnaartoq
Mittarfimmik sanaartorfimmik anisoqaqqusaananilu suli isertoqaqqusaanngitsoq nakorsaanerup erseqqissaatigaa.
- Tamanna Tunillaassortunik nappaalanersuaqarneranut ataatsimiititaliarsuarmit malittarisassatut aalajangerneqarsimasunut ilassutaavoq, taamaalilluni illoqarfiup iluani tunillaasoqarnissaanut aarlerinartorsiortitsisoqarani suliaqarneq illersorneqarsinnaasumik aallartissinnaassalluni, nakorsaaneq nassuiaavoq.
Sumi tunillatsissimanerata ilisimaneqannginnera paasineqartoq
Nuummi coronavirusimik tunillaassuuttoqaratarsinnaanerata aarlerigineqarnera pissutigalugu illoqarfiup matuneqarneranit sapaatit akunnerata aappaata affaa qaangiuppoq. Nuummimi covid-19-imik tunillatsissimasoqarneranit kingullermit ukiup affaata missaata kingorna tunillatsissimasutut uppernarsarneqartut amerlipput.
Inuit marluk nunatsinnukarsimasut angerlarsimmaannarsimareersullu tunillatsissimasutut siullermik paasineqarput. Tamatuma kingorna inuk alla tunillatsissimasoq uppernarsarneqarpoq. Pineqartulli nunatsinnut sapaatit akunneri arfinillit sioqqullugillu nunatsinniilereersimavoq. Taamaammat sumit tunillatsissimanera ilisimaneqanngilaq.
Taassumali sumit tunillatsissimanerata ilisimaneqannginnera inissinneqarpoq.
AAMMA ATUARUK Nuummi killilersuinerit sukaterneqarput
- Inuk marluk tunillatsissimasut piffissami ataatsikkut tikipput. Taakkulu inuit allat arfineq-marluk tunillappaat, tamanna inuup ataatsip tamarmilluunniit tunillaaneraneersuunersoq piffissami matumani ilisimanngilarput, Henrik L. Hansen oqarpoq, nangillunilu:
- Misissukkat misissorneqaqqissaartussanngorlugit Danmarkimut nassiussatta ineratigut tamanna ilisimasaqarfigilersinnaassavarput, Danmarkimimi virusi misissorluaqqissaarneqarluni virusi sorliunersoq paasiniarneqartarpoq.