- Inuusuppallaanngitsunik qulinit tunillatsissimasoqarneranit ataatsimik napparsimmavimmut unittariaqarnissamik passunneqarnissamillu pisariaqartitsisoqarnissaa ilimanartuuvoq, Henrik L. Hansen oqarpoq. Assi: Jonas Løvschall-Wedel

Coronamik tunillatsissimasoq Nuummi napparsimmavimmut unitsinneqartoq

Mittarfimmik sanaartortunit tunillatsissimasoq ataaseq Dronning Ingridiup Napparsimmavissuanut ullumi unitsinneqarpoq. Pineqartoq napparsimangaatsialersimasoq, nakorsaaneq oqarpoq.

- Tunillatsissimasunit ataaseq napparsimangaatsialersimavoq, napparsimanerminillu ilungersornerunera pissutigalugu Dronning Ingriup Napparsimmavissuanut maanna unitsinneqarpoq.

Nakorsaaneq, Henrik L. Hansen Knr-imut oqarpoq.

Mittarfimmik sanaartortuni tunillatsissimasunit ikinnerpaamik ataatsimik ilungersornerusoqarnissaa naatsorsuutaareersoq nakorsaanerup nassuiaatigaa.

Taakkumi ilaat inuusuttuunngillat.

AAMMA ATUARUK Mittarfiliortuni sulisoq ataaseq tunillatsittoq

- Inuusuppallaanngitsunik qulinit tunillatsissimasoqarneranit ataatsimik napparsimmavimmut unittariaqarnissamik passunneqarnissamillu pisariaqartitsisoqarnissaa ilimanartuuvoq. 

Pineqartoq napparsimmavimmi iltilersorneqarlunilu tarajulersorneqartoq nakorsaanerup nassuiaatigaa.

- Taamaaliornikkut napparsimarulunnginnissaa qulakkeerneqarsinnaassalluni, Henrik L. Hansen oqarpoq.

Napparsimmavimmut unissimasup piffissap sivisunngitsup ingerlanerani napparsimmavimmit angerlaqqissinnaanissaa nakorsaanerup naatsorsuutigaa.

Tunillatsissimasut sisamat

Nuummi tunillatsissimasutut nalunaarsorneqarsimasut sisamaapput.

Taakku tamarmik nakorsaanerup Henrik L. Hansenip oqarnera naapertorlugu suliffeqarfimmi ataatsimi sulisuupput. Tassa suliffeqarfik Munch Gruppen, Nuummi nutaamik mittarfiliornermik suliaqartoq pineqarpoq.

Tunillatsissimasutut paasineqarsimasut amerlanerpaagamik piffissami juunip aallartinnerani qulingiluaapput. Taakkulu mittarfiup eqqaani najugaqarfimminni imminnut tuniluussimanissaat ilimanarluinnarluni.

Tunillatsissimasunit arfinillit juunip ulluisa arfineq-aappaanni peqqisseqqissimasutut nalunaarutigineqarput.

AAMMA ATUARUK Tamaat isigalugu: Coronavirus pillugu killiffik

Mittarfiliornermik suliaqartut 80-it missaanniittut misissortikulapput, najugaqarfianniillu ataaseq alla tunillatsissimasoq juunip ulluisa qulinganni paasineqarluni.

Mittarfimmi sanaartornermi sulisut angerlarsimaannaqqusaanerat pissutigalugu sapaatip akunnerata missaani uninngatinneqarnikuuvoq, suliaqarnerli juunip ulluisa arfineq-pingajuanni aallarteqqinneqarluni.

Nunatsinni tunillatsissimasutut paasineqarsimasut katillugit 44-nikuupput. Taakkunannga 40-t peqqisseqqissimasutut nalunaarutigineqarnikuupput.

Nunatsinni tunillatsissimasutut nalunaarsorneqarnikuusimasunit ataaseq Nuummi Dronning Ingriup Napparsimmavianut unitsinneqarnikuuvoq. Tamanna decembarip ulluisa 31-anni pivoq, tunillatsissimasoq nappaatigiuakkani pissutigalugu Danmarkimut katsorsartikkiartorsimavoq. Napparsimasoq perululluni napparsimanngilaq - nakorsaanerullu oqarnera naapertorlugu taassuma nappaataa pissutaalluni napparsimmavimmi uninngatinneqarpoq.

Isummersuutit

Nunatsinni coronavirusi pillugu
killiffik

Tunillatseqqasut 63  
Siullermik kapitissimasut 36.921  
Aappassaa kapitissimasut 26.924  
Misissorneqareersimasut 42.668  
Tunillanneqarsimasut 150  
Peqqisseqqittut 87  
Uninngasut 0  
Anersaartuuteqartitaasut 0  
Toqquteqartut 0  
nun.gl-imi titartaganngorlugit:
Kapitissimasut | Tunillatsissimasut
 
   Nutarterneqarpoq: 
Augustip 5-at 2021 nal. 10:45
 

Coronavirusimik tunillatsinissaq pinaveersaaruk