Assi: Scanpix

Coronamik tunillatsissimasoq alla Nuummi paasineqartoq

Covid-19-imik tunillatsissimasutut ippassaq paasineqartumut qanigisaasoq aamma tunillatsissimavoq.

Coronamik tunillatsissimasoq alla Nuummiittoq paasineqarpoq.

Tunillatsissimasoq tunillatsissimasutut ippassaq paasineqartumut qanigisaasuuvoq.

Naalakkersuisunit tusagassiuutinut nalunaarut naapertorlugu tunillatsissimasut marluullutik maannakkut mattuteqqapput.

Angerlarsimaannarneq misissorteqqinnerlu

Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat. 

Angerlarsimaannarninni pisuttuarsinnaavutit aamma najugaqatigisannut qanillisinnaavutit. 

Niuerniarsinnaavutit.

Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.

Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.

Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.

- Taakku nutaat tunillatsissimasut marluk aqunneqarsinnaanngitsumik tunillaassuutsitsilernissaat ilimagineqanngilaq, naalakkersuisut paasissutissiipput.

Tallimanngornermi tikittoq coronamik tunillatsissimasoq paasineqarpoq. Taassuma tunillatsissimanera marlunngornermi paasineqarpoq. Tunillatsissimasoq nunatsinnut tikikkami ingerlaannartumik angerlarsimaffimmini ulluni tallimani mattuteqasimavoq. Tunillatsissimaneralu misissorteqqinnerani marlunngornermi paasineqarluni.

Nuummi qaammatini arfinilinni tunillatsittoqarsimanngitsoq

Nuummi kingullermik tunillatsissimasoqarneranit qaammatit arfinillit qaangiupput. Kingullermillu coronamik tunillatsissimasumik juulip ulluisa 24-anni Nanortalimmi paasisaqartoqarpoq.

Coronavirusimik Ilulissani inummik ataatsimik Aasiannilu inummik ataatsimik tunillatsissimasoqarnikuuvoq. 

Coronavirusumik Nuummi inunnik aqqanilinnik tunillatsissimasoqarnikuuvoq. 

Coronavirusumik nunatsinni tunillatsissimasutut paasineqarsimasut maannamut katillutik 16-iupput. 

Taakkunannga 14-it peqqisseqqissimasutut nalunaarutigineqarnikuupput. 

Coronavirusi Danmarkimi Islandimilu aggustimi septembarimilu tuniluutilertoqqippoq. Naalakkersuisut coronavirusip nunatsinni tuniluutileqqinnissaa aarleqqutigimmassuk nunatsinnut angallannermut malittarisassat septembarip ulluisa 30-anni sukannernerulersippaat.

Nutaanik malittarisassaliunngillat – malittarisassalli upernaaq atuuttut atuutilerseqqippaat. Tassa imaappoq, nunatsinnut tikinnermiit ulluni tallimani angerlarsimaannarnissaq tamatumalu kingorna misissorteqqinnissaq piumasaqaataalerput. Tunillatsissimasorlu Nuummiittoq malittarisassanik taakkuninnga malinnissimavoq.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 13307
  Tunillanneqarsimasut
18
  Peqqisseqqittutut nalunaarutigineqartut 18
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Takuuk: nun.gl Nunatsinni Nakorsaaneqarfik
  Nutarterneqarpoq
  decembarip 1-at 2020 nal. 10:45