Pinerluuteqarsimasunut inissiisarfimmiittut coronavirusi tunillaassuuteqqilissappat nunatsinni eqqartuussisarnermut inatsimmik pinerluttulerinermilu inatsimmik allannguinikkut pulaartoqarsinnaajunnaarsinnaapput.Assi: KNR

Coronamik siaruatsaaliineq: Pinerluuteqarsimasunut inissiisarfinnut pulaartoqaqqusaajunnaarsinnaasoq

Coronavirusi siaruatsaaliniarlugu pinerluuteqarsimasunut inissiisarfinnut pulaarneq inissiisarfinniittullu aneernissaat inerteqqutigineqarsinnaanngussapput. Tamakku inatsimmik allannguinissamut assersuutit Folketingimi oqallisigineqartussat ilagaat.

Nunatsinni sivisuumik coronaviruseqartoqanngereersorlu ataasiinnarmik maanna tunillanneqarsimasoqarpoq.

Coronavirusimik nunatsinni sullivinni inatsiseqarnermut tunngasuni Danmarkimit suli akisussaaffigineqartuni siaruatsaaleeqataasinnaasunik malittarisassaqalernissaa, danskit naalakkersuisuisa taamaalisukkut siunnersuutigaat.

Inatsimmik allannguineq ilaatigut Pinerluttunik Isumaginnittoqarfimmi sulisut pinerluuteqarsimasunut inissiisarfinniittut ilaquttaminnik ikinngutiminnillu pulaartoqarnissaannut inerteqquteqarsinnaatitaalernerannik kinguneqarsinnaavoq. 

AAMMA ATUARUK Naalakkersuisut erseqqissaassuteqalersut: Politiit angerlarsimaffinnut isersinnaanngussanngillat

Inissiisarfimmiittut aneernissaminnut katerinnissaminnullu aamma inerterneqarsinnaanngussapput.

Taamaaliornerit inissiisarfinniittut taakkunanilu nakkutilliisut coronavirusimik inatsisissatulluunniit siunnersuummi allagaq naapertorlugu 'nappaatinik allanik nalinginnaasunik' tunillanneqarnissaannik pinaveersaartitseqataasinnaapput.

Nunatsinnilu pinerluuteqarsimasunut inissiisarfinniittut Danmarkimi parnaarussivimmut Herstedvesterimut Nuummilu inissiisarfimmut nuunnissaminnut aamma itigartitaasalernissaat aappaattut periarfissaavoq.

Malittarisassat tamakku Danmarkimi atuuttut

Malittarisassat tamakku Danmarkimi Folketingemit atuutilersinneqareerput. Danmarkimimi politikerit nappaalanermut inatsimmik arlalitsigut allannguisoqarnissaa marsimi akuerimmassuk atuutilersippaat.

Malittarisassalli tamakku danskit nunatsinni eqqartuussiveqarfianni atuutinngillat. Taamaammat nunatsinni atuutilersinneqassappata inatsisip allanngortinnissaa pisariaqarpoq.

Inatsisissatut siunnersuummi malittarisassat nutaat taakku inatsimmi nukingisaarutaasumi malittarisassanut, Inatsisartuni amerlanerussuteqartunit ukioq manna apriilip aallaqqaataani akuerineqartunut, assingoqaat.

AAMMA ATUARUK Ulloq kiisami aalajangerneqarpoq: Nunarput juunip 15-iani ammaqqissaaq

Amerlanerussuteqartut Siumumeersut, IA-meersut, Nunatta Qitornaanneersut Demokraatineersullu assersuutigalugu inuit coronaviruseqartutut oqartussanit ilimatsaanneqartut misissortinnissaminnut napparsimmavimullu uninnnissaminnut Tunillaassortunik Nappaalanersuaqarneranut Ataatsimiititaliarsuarmit inanneqarsinnaasalernissaannik akuersipput.

Coronavirusilu siaruatsaaliniarlugu tamanut angallassissutinut ilaaneq tamanulluunniit ammasumik ataatsimiinneq Inatsisartut inatsisaat nukingisaarutaasoq naapertorlugu inerteqqutigineqarsinnaanngussapput.

Danskit inatsisaannik allanguinissamut siunnersuut Folketingimi tallimanngorpat siullermeerneqartussaq Folketingimit 2021-mi decembarip ulluisa 31-niutinnagu sivitsorneqanngippat ullormi tassani atorunnaarsinneqassaaq.

Isummersuutit