Corona virusimik tunillatsittut toqusullu amerliartorput

Nappaammik corona virusimik Kinami tunillatsissimallutik toqusut amerliartuinnarput maanna 56-it toqusimasut nalunaarutigineqarpoq.

Tamanna Kinami oqartussaasunit uppernarsarneqarpoq, Kinami nunap immikkoortuani Hubeimi toqusut 13-it nalunaarutigineqarmata, isumaqartoqarporlu corona virus nunap immikkoortuani Hubeimi aallartittoq

Taassuma saniatigut Kinami illoqarfiit anginersaanni Shanghaimi corona virusimik tunillatsissimalluni toqusoq sapaatip ullaassaani oqartussaasunit nalunaarutigineqarpoq, aatsaallu illoqarfissuarmi Shanghaimi tunillatsissimasumik toqusoqarluni.

Kinami corona virusimik tunillatsissimasut 600-it missaannittut paasineqarpoq.

Taamaalillutik Kinami tunillatsissimasut 1975-inngorput.

Kinap naalagaaffiata tusagassiisarfia CCTV taama allaaserisaqarpoq.

Ilungersunartoq 

Kinami præsidentip Xi Jinpingeip arfininngornermi mianersoqqussutigivaa, corona virusi Kinamut ilungersunartorsiorfiummat, pisortallu ilungersorlutik nappaatip siaruaatinnginnissaanik sulimmata.

Kinami nunap immikkoortuani Hubeimi, illoqarfimmut Wuhanimut angallanneq inerteqqutaavoq, aamma illoqarfinnut allannut 18-nut nunap immikkoortuani Hubeimiittunut angallanneq taamatuttaaq inerteqqutaavoq tunillaassuunneq killilersimaarniarlugu.

Nunap immikkoortuani Hubeimi killilersuisoqarnerani inuit 56 milliuunit eqqugaapput.

Nunat corona virusimik tunillatsissimasorineqarlutik nalunaarsorneqartut kingullersaraat

Canada,

Canadami naalakkersuisut tusagassiuutinut nalunaaruteqarlutik tamanna uppernarsarpaat.

Corona virusimik tunillatsissimasorineqartoq, Kinami nunap immikkoortuanut Hubeimut tikeraareerluni Canadamut uterluni angerlartoq pineqarpoq.