Avannaata Qimussersua kinguartinneqarsinnaanngilaq.Assi: Johan Geisler

Corona tuniluutsinnaversaarniarlugu Avannaata Qimussersua taamaatiinnarpaat

Nunatsinni coronamik tunillatsisimasoq siulleq nalunaarutigineqarmat qimussertartut kattuffianni siulersuisut ataatsimiikkasuarput

Avannaata Qimussersua marsip 28-at Uummannami pisussaagaluaq taamaatiinnarneqarpoq. Qimussertartut kattuffianni KNQK-mi siulersuisut isumaqatigiissut ataasinngornermi ullaap tungaa taama aalajangerput. Nunatsinni corona-virusimik tunillatsissimasup siulliup paasineqarnera aalajangernermi aalajangiisuuvoq.

AAMMA ATUARUK Nunatsinni inuk ataaseq coronavirusimik tunillatsissimasoq

Naalakkersuisut siulittaasuat Kim Kielsen ataasinngornermi ullaap tungaa tusagassiortunik katersortitsinermi nalunaarpoq corona-virusimik tunillatsissimasumik Nuummi paasisaqartoqartoq. Tunillanneqarsimasoq ilaqutaalu maanna mattusimaneqarallarput.

Tusagassiortunik katersortitsineq malinnaaffigereerlugu erngerluta ataatsimiippugut. Siullersuisuni ilaasortat tamarmik isumaqatigiillutik aalajangerpaat Avannaata Qimussersua taamaatiinnarneqassasoq corona-virusip tuniluunnissaa pinaveersimatinniarlugu. Aaqqissuussaq kinguartiinnarsinnaanngilarput sukkaniunnermi aput immallu sikua ingerlavinni isorartuuni pinngitsoorneqarsinnaanngimmata, KNQK-mi siulittaasoq Johan Olsen KNR-mut oqarpoq.

AAMMA ATUARUK Avannaata Qimussersua annikillisamik pissaaq

Sukkaniuteqataasussat Upernavik Kujallermiit aamma Kangersuatsiamiit Uummannamut apuutereeraluarput sukkaniunnissarsuarmut piareersariartorlutik.

- Piareersaatit annertoruujussuit pereernikuupput. Aamma Upernavik Kujallermiit Kangersuatsiamiillu tikereeraluit ajuusaarluta nalunaarfigaavut allatut ajornartumik utiinnartariaqalersut, Johan Olsen oqarpoq.

Nunap immikkoortuani sukkaniunnerit

Avannaata Qimussersuata saniatigut tunumi Kangiata Qimussersua aamma avanersuarmi Inughuit Qimussersuat pisarput.

- Tunumi Kangiata Qimussersua taamaatiinnarparput. Avanersuarmi sivisunerusumik sikuusarpoq sukkaniunnerlu apriilip naanerani imaluunniit maajip qaammataani pisinnaasarpoq. Tamanna pillugu kingusinnerusukkut aalajangertoqarumaarpoq, Johan Olsen oqarpoq.

AAMMA ATUARUK Frygt for corona: Hundeslædevæddeløb for børn er aflyst

Avannaata Qimussersuata taamaatiinnarsinnaanera arlaleriarlun KNQK-mi eqqartorneqartarpoq. Meeqqat Avannaata Qimussersuaaraqarnissaat martsip 24-at pisussaq taamaatiinnartoq sapaatip akunnera kingulleq aalajangiunneqarpoq. Tassunga peqatigitillugu KNQK aalajangeraluarpoq inersimasut sukkaniunnissaat pissasoq – taamaattorli illup iluani pisussat taamaatiinnarneqarlutik.

- Aaqqissuisuniit suliarujussuaq maannamut naammassineqarnikuuvoq. Kisianni corona-virusimik tunillatsissimasoq siulleq paasineqarmat allaanerusumik aalajangersinnaanngilagut, Johan Olsen naggasiivoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat