Corona pillugu ullumikkut kisitsisit: Tunillatsissimasut nutaat arfineq-pingasut
Kangerlussuarmi tunillanneqarsimasup nutaap ataatsip nassaarineqartup sumi tunillatsissimanera ilisimaneqanngilaq.
Taama Nunatta Nakorsaaneqarfia nalunaaruteqarpoq.
Killilersuutit atuutsinneqaqqilersinnaasut
Coronavirusi Nuummi tuniluutipiloorpoq. Tamanna pillugu naalakkersuisut tusagassiortunik nalunaaqutaq pingasunut katersortitsissapput, tusagassiortunik katersortitsineq KNR-ikkut malinnaavigineqarsinnaavoq.
- Killiffipput imaannaanngeqaaq, peqqissutsimut naalakkersuisoq KNR-imut tallimanngornerup ullaap tungaani oqarpoq.
Atuartut angerlarsimatinneqartut misissortinniarlutillu utaqqisorpassuit
Coronamik tunillatsittut sapaatip akunnerani qaangiuttumi amerlipiloornikuupput. Ingasammik Nuummi.
- Killiffipput imaannaanngeqaaq. Ullut pingasut ingerlanerini tunillanneqartut 100-t qaangersimagaat assi ilungersunartoq erserpoq, peqqissutsimut naalakkersuisoq Kirsten L. Fencker Nunatta Nipaanut oqarpoq.
Tamannalu isumaqarnerluni killersuutinik atuutsinneqaqqilernissaannik?
Tamanna ualimut aatsaat annertunerusumik paasisaqarfigissagipput naalakkersuisoq ilisimatitsivoq.
- Oqaatigisinnaavara partiit siuttui ippassaq isumasioqatiginikuugatsigit. Taamaattumillu tusagassiortunik ualeru katersortitsinissarput pilersaarutigaarput, Kirsten L. Fencker oqarpoq.
Atuarfinni oqaluffimilu corona
Nunatta Nakorsaaneqarfianit nalunaarutigineqartut naapertorlugit Nuummi tunillaassuuttoqangaatsiarpoq, tamannalu aamma sineriammi illoqarfiit ilaanni tunillatsittoqarneranik malitseqarsimavoq.
Meeqqat akornanni tunillaassuuttoqarneruvoq, tamannalu maannamut nunatsinni illoqarfiit pingaarnersaanni meeqqanik atuartorpassuarnik angerlarartitsigallarnermik kinguneqarsimalluni.
Tamatuma saniatigut ippassaq ilisimatitsissutigineqarpoq Inuunerup Nutaap Oqaluffiata Nuummi aaqqissuussaani, nunatsinni sumiiffinnit assigiinngitsuneersunit peqataaffigineqartuni, arlallit aamma tunillanneqarsimasut.
Timmisartumi tunillaassuuttoqarsinnaasoq
Sinerissamut timmisartuussinerit ilaanni aamma sapaatip akunnerata aallartinnerani tunillatsittoqaratarsinnaasimavoq.
Kisianni angallassinerit killilersorneqalissanersut Kirsten L. Fenckerip tusagassiortunik katersortitsinissaq sioqqullugu oqaaseqarfigerusunngilaa.
- Tusagassiortunik katersortitsinitsinni taakku ersarissumik oqaaseqarfigiumaarpagut, peqqissutsimut naalakkersuisoq Kirsten L. Fencker Nunatta Nipaani apersorneqarluni oqarpoq.
Tunillatsissiamasut maanna amerlassusaat kommunikkaarlugit imaapput:
Avannaata Kommunia: 2
Kommune Qeqertalik: 1
Qeqqata Kommunia: 7
Kommuneqarfik Sermersooq: 110
Kommune Kujalleq: 0