Corona pillugu ullumikkut kisitsisit: Tunillatsissimasut nutaat 445-t
Nunatsinni coronamik tunillatsissimasut 445-t ippassarmeersut paasineqarput.
Misissueriaaserli nutaaq sapaatip akunnerata siuliani atuutilersinneqartoq pissutigalugu tunillatsissimasut suli amerlanerungaatsiarsinnaapput.
Nunatta nakorsaaneqarfiata tunillatsissimasut 445-t nalunaarsugai PCR-imik misissuinernit 797-ineersuupput. Tassa imaappoq PCR-imik misissukkanit affaat sinnerlugit tunillatsissimapput.
PCR-imik misissuinerit kommuninit ukunaneersuupput:
- Avannaata Kommunia: 99-it
- Kommune Qeqertalik: 38-t
- Qeqqata Kommunia: 61-it
- Kommuneqarfik Sermersooq: 242-t
- Kommune Kujalleq: Tallimat
Misissuerisaaneq nutaat pissutigalugu angalasussat coronamillu napparsimangaatsiartut kisimik PCR-imik misissortissinnaapput.
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Inuit coronamik napparsimarululersinnaasut aamma angalasussat coronapasimik atuisussat misissortissinnaapput.
Allat sinneri angerlarsimaffimminni imminnut misissorsinnaapput aamma/ imaluunniit peqqisseqqinnissartik utaqqissavaat.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Neriniartarfiit imerniartarfiillu januaaripo ulluisa 25-ata tungaanut unnukkut quliniit ullaakkut tallimat tungaanut matoqqasassapput.
Allat sinneri angerlarsimaffimmi, atuarfimmi suliffimmiluunniit misissortinnissamut – imaluunniit misissortinngiinnarnissamik innersuunneqarput. Taakku angerlarsimmafimmut mattutissapput peqqissinissartillu utaqqillugu. Aamma imminnut peqqissisutut nalunaarutigisassapput.
Taamaalilluni nunatsinni oqartussat coronamik akiuiniarnermi suliassaanni kikkunnik tamanik misissuinissaq pingaarnerpaajunnaarpoq. Peqqinnissaqarfiit misissuisarfiillu tunillatsissimasorpassuit pissutigalugu angummassinnaajunnaarlutik kikkunnut tamanut PCR-imik misissuisinnaajunnaarmata misissueriaaseq atulersinneqarpoq.
Nunatsinnilu tunillatsissimasut ataatsimut amerlassusaat taamaalilluni ilisimaneqarunnaarluni, taamaammat coronamik tunillatsissimasut napparsimmavimmut nalunaarutigineqanngitsut amerlangaatsiarsinnaapput.
"Suna tamarmi allanngortoq"
Tunillatsissimasut nunatsinni tunillatsissimasunut amerlanerpaaffigisaanni januaarimi amerlanerpaalerput: Januaarip ulluisa qulinganni covid-19-imik tunillatsissimasut 3.000-ingajaapput.
Ulloq taanna misissueriaaseq nutaaq atulersinneqarpoq, Naalakkersuisut oqarnerat naapertorlugu tunillaassuinerup siammasinnera ataavarneralu peqqinnissaqarfimmut ilungersortitsinera tamatumani pissutaavoq.
Misissueriaaseq nutaaq tusagassiortunik katersortitsinermi saqqummiunneqarmat peqqissutsimut naalakkersuisuugallartoq, Mimi Karlsen (IA) ima oqarpoq:
- Naalakkersuisullu nassuerutigaat suut tamarmik allanngortut uagullu allaannerusumik suliniuteqartariaqartugut. Siullermik erseqqissassallugu pingaartuuvoq akiuussutissamik kapuinerit napparsimarulunnissamut, napparsimavimmut unitsinneqarnissamut toqusoqarnissaanullu sakkussaammata pitsaanerpaajusut. Taamaammat inuiaqatigiillu ataasiakkaatullu akiuussutissamik kapitinnissamut akuersinissarput pingaartuuvoq.
- Isumalluutit pingaaruteqartut pinngitsoorneqarsinnaanngitsullu pitsaanerusumik atussavagut. Taamaaliussaagut suliaqarnerit inuttaasut peqqissusiannut pingaaruteqartut suli ingerlaannarnissaat qulakkiissagatsigu.
Nakorsaanerup, Henrik L. Hansenip oqarnera naapertorlugu tunillatsissimasut sapaatit akunnialui qaangiuppata amerlanerpaaffissaminiilissapput.
Killilersuinerit imigassamillu inerteqquteqarneq
Nunatsinni sumiiffinni amerlasuuni killilersuinerit atuutilersinneqarput. Taamaammat aqqaneq-marluleereersimasut covid-19-imut tamakkiisumik akiuussuserneqarsimanertik, tunillatsinnikuusimanertik imaluunniit tunillatsissimannginnertik tamanit ornigarneqarsinnaasuniinniarunik uppernarsarsinnaassavaat.
Aqqaneq-marluleereersimasut tamarmik pisortat angallassisuutaanni iniutaannilu qanermut assiaquteqassapput. Aamma init inoqarsinnaassutaatut qatserisartut akuerisaasa affaannaat isersimasinnaapput. Kiisalu neriniartarfiit imerniartarfiillu unnukut qulinut matusassapput.
Taakku illoqarfinni ukunani atuupput: Paamiut, Qaqortoq, Aasiaat, Sisimiut, Ilulissat, Kangerlussuaq, Maniitsoq, Nuuk, Qasigiannguit, Upernavik, Tasiusaq, Upernavik Kujalleq, Nutaarmiut, Nuussuaq, Innaarsuit, Naajaat, Aappilattoq, Kangersuatsiaq, Kullorsuaq aamma Narsaq.
Qeqqata Kommuniani imigassamik nioqquteqarsinnaaneq inerteqqutigineqarallaqqippoq.
