Corona pillugu ullumikkut kisitsisit: Nutaat 477-it paasineqarput ataatsimillu toqusoqarluni
Tunillatsissimasut ullup ataatsip kingulliup ingerlanerani paasineqartut 477-iupput.
Kommuneqarfik Sermersuumi ataatsimik toqusoqarpoq.
Nunatsinni tunillatsissimasut maanna katillugit 2.718-iupput – tunillatsissimasullu aatsaat taama amerlatigipput.
Tunillatsissimasut nutaat illoqarfikkaarlugit ima amerlagipput:
- Ilulissani 172-it
- Aasianni ataaseq
- Kangerlussuarmi marluk
- Sisimiuni 29-t
- Maniitsumi arfineq-pingasut
- Nuummi 224-t
- Narsaami 37-t
- Qaqortumi ataaseq
- Nanortalimmi pingasut
Nunatsinni covid-19-imik tunillatsissimasut napparsimmavimmi uninngasut katillugit arfineq-pingasuupput: Upernavimmi ataaseq, Maniitsumi ataaseq, Nuummi arfinillit, taakkunanngalu ataaseq Nuummi peruluttut uninngavianni suli uninngalluni.
Ilulissani misissortittut affaat tunillatsissimasartut
Illoqarfimmi Covid-19-imik tunillatsissimasut minnerpaamik maanna 600-t angusimalepaat, 1000-niillu amerlanerusut tunillatsereersimassangatinneqarput.
Ilulissani qitiusumik napparsimmavik taama nalunaaruteqarpoq.
Tassa Ilulissani innuttaasunit 5.000-nit 20 procentiisa missaat tunillatsissimapput.
Qitiusumillu napparsimmaviup oqarnera naapertorlugu ”Ilulissaniittut amerlanerpaartaat piffissami matumani tunillatsinnissaat ilimagineqarpoq”.
Ilulissani napparsimmavik taamaammat tamanut kaammattuuteqarpoq:
Ersiuteqartut tamarmik mattutissapput, taamaaliornikkummi kisimi tuniluunneq pakkersimaarneqarsinnaavoq.
Tunillatsissimasunit peruluttoqanngilaq, taakkuli nuffasernermik toqqusaarlunnermillu ullualuit iluanni qaangiuttussanik ersiuteqarput.
Napparsimagaanni tunillatsissimanermik uppernarsaataasussamik misissortinnissaq pisariaqanngilaq. Angerlarsimaannarit, isumalluutit taamaalillutik ikiorneqarnissamik pisariaqartitsisunut atorneqarsinnaassapput. Taamaammat apparsimmavimmut attaveqarnissaq pisariaqanngitsoq, napparsimmavik oqarpoq.
Taamaallaat tunillatsissimasumut qanillisimanermit ullut arfineq-marluk kingorna ilungersunartumik ersiuteqaraanni imaluunniit inuiaqatigiinnut pingaaruteqartumik atorfeqaraanni napparsimmavimmut attaveqartoqassaaq.
Ilulissani inuit 80 procentii akiuussutissamik kapitissimalereerput, inuillu pingasuungaangata pingajuat pingajussaanik kapitereerluni.
