Corona pillugu ullumikkut kisitsisit: Napparsimmavimmi uninngasut arfineq-pingasut
Nakorsaaneqarfimmit tunillatsissimasut nutaat ullumikkut nalunaarutigineqarput.
Sumiiffinni arlalinni tunillatsissimsut ikiliartorput, sumiiffinnili allani suli amerliartorlutik.
Kommuneqarfik Sermersuumi Paamiuni Tasiilamilu annertuumik tuniluuttoqarpoq.
Nunatta kujataani Nanortalimmi annertuumik tuniluuttoqartoq Qaqortumi Narsamilu ikiliartorput.
Qeqqata Kommuniani sumiiffinni amerlanerusuni tunillatsissimasut nalinginnaasumik suli amerlapput.
Misissuisarnermut periuseq nutaaq
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Tassa utoqqaat inuillu uummatikkut puatigullu nappaateqartut misissortissinnaapput.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Kommune Qeqertalimmi Qasigiannguani sumi tuniluunneq siammasippoq, Aasiannili ikiliartorlutik. Avannaata Kommuniani Ilulissani tuniluuttukinneruleriartorpoq, taamaakkaluartorli Uummannami Qaanaamilu suli tuniluuttoqarluni.
Coronap allannguutaa Upernavimmut suli anngussimarpasinngitsoq nakorsaaneqarfiup allappaa. Upernavimmi ukiup kingulliup naajartornerani coronap allannguutaanik Deltamik annertuumik tuniluuttoqarpoq, tassanilu Upernavimmiittut ikinnerpaamik affaat tunillatsissimanissaat nakorsaanerup nalilerlugu.
Peruluttut uninngavianniittoqanngitsoq
Utoqqaq qaammatip kingulliup ingerlanerani coronamik tunillatsissimasoq ullumi marlunngornermi toquvoq. Taamaalilluni nunatsinni coronamik tunillatsissimallutik toqusut katillugit qulinngorput.
Ataasinngornermi coronamik tunillatsissimasut pillugit saqqummisoqarnerata kingornatigut napparsimmavimmi uninngasut pingasut – tassa Nuummi marluk Qaqortumilu ataaseq angerlartinneqarput. Nuummi Sisimiunilu napparsimavimmut unitsinneqartut katillugit pingasuupput. Tamaat isigalugu nunatsinni uninngasut katillugit arfineq pingasuupput - Nuummi sisamat, Sisimiuni pingasut Paamiunilu ataaseq.
Napparsimmavimmut uninngasunit pingasut coronamik tunillatsissimanertik pingaarnertut pissutigaat.
Uninngasunit ataaseq covid-19-imik tunillatsissimanerat nappaataannut ajoqusernerannulluuniit allamut unitsitsissutaasumut sunniuteqarpoq.
Uninngasunit sisamat allamik pissuteqarlutik uninngapput. Taakku coronamik tunillatsissimanerat paasineqarpoq, tamannali uninnganerannut sunniuteqanngilaq.
Peruluttut uninngavianni uninngasoqanngilaq.
Nuummi misissuisarfik inissisimaffitoqqaminut utertinneqartoq
Nuummi peqqinnissaqarfiup misissuisarfik Inussivimmiit inissisimaffitoqaanut – tassa kalaaliaratoqqamut Brugsenip eqqaanut uterteqqippaa. Peqqinnissaqarfimmi misissuisarnermisulli amerlatigisumik misissuisarunnaarpoq – misissuinermimi periuserineqartoq atorneqarunnaarluni inuit covid-imik tunillatsissimanerminnik napparsimarululersinnaasut kisimik PCR-imik misissortissinnaalerput.
Peqqinnissaqarfiup Inussivimmi misissuisarfini matuaa illoqarfiullu qeqqanut mikinerusumut uteqqilluni. Nuummi misissuisarfiup nutserneqarnera pissutigalugu misissuisarfik ullumi marlunngornermi matoqqatinneqarpoq, aqaguli pingasunngornermi Brugsenip eqqaani kalaaliaratoqqami ammassalluni.
Misissuisarfiup nuunneranut atatillugu ammasarfiit aamma nutaanngorput: Februaarip ulluisa 16-iannit ammasarfiit imaalerput:
- PCR-imik misissortinneq: ataasinngornerneq-tallimanngorneq 08.00-imit 11.00-imut
- Sukkasuumik misissuutinik agguaaneq: ataasinngorneq-tallimanngorneq 11.00-imit 15.00-imut
- Misissortinnermit akissutit amigaataasut pillugit oqarasuaammut sianerneq: ulluinnarni 11.00-imit 12.00-imut
Misissuisarfik sapaatip akunnerata naanerani matoqqasassaaq.
