Assi: KNR

Corona pillugu ullumikkut kisitsisit: Arfininngormamit ullumikkumut tunillatsissimasut nutaat 479-it paasineqartut

Tunillatsissimasut amerlassusaat arfininngormamit ullumikkumut ikileriangaatsiarput - ikilineralli misissuisarnermut periuseq nutaaq isiginiarneqassaaq.

Nunatsinni ullut marluk kingulliit ingerlanerini tunillatsissimasut 479-it paasineqarput.

Taakku ullunit marlunnit tunillatsissimasutut paasineqartunut arfininngormat saqqummiunneqartunut 788-inut sanilliullugit ikileriarput.

Kisitsisilli misissuisarnermi periaaseq nutaaq sapaatip akunnerata siuliani saqqummiunneqartoq maannalu allanngortinneqareersoq eqqarsaatigalugu isigineqassapput:

Napparsimarululersinnaasut kisimik PCR-imik misissorneqarsinnaapput. Allat sinneri sukkasuumik misissuut atorlugu imminnut misissorsinnaapput aamma/ imaluunniit angerlarsimaannarlutik peqqisseqqinnissartik utaqqissavaat.

Misissuinermi periuseq nutaaq sapaatip akunnerata ataatsip matuma siorna saqqummiunneqarmat angerlarsimaffimmi sukkasuumik misissornermi tunillatsissimasut aamma misissortikkiartorsinnaagaluarput, tamanna isumaginninnermut, suliffeqarnermut nunamullu imminermut naalakkersuisup, Mimi Karlsenip (IA) oqaatigaa.

AAMMA ATUARUK Misissuisarfiit napparsimmaviillu ilungersungaatsiarmata kikkunnut tamanut PCR-imik misissuisoqartarunnaartoq

Innuttaasut affaat sinnerlugit tunillatsissinnissaat nakorsaanerup naatsorsorpaa - amerlanerillu corona nuannertut nuallunnertullu taamaallaat misigissagaat, nalilerpaa.

Illoqarfinni marlunni utoqqaat illuanni tuniluuttoqartoq

- Innuttaasut affai sinnerlugit tunillatsinnissaat ilimagaara, nakorsaaneq, Henrik L. Hansen oqarpoq.

- Coronamik ersiuteqaraanni tamanna naammappoq, taava tunillatsittoqarsimassaaq. Amerlasuut piffissami sivikitsuinnarmi napparsimasarput. Napparsimarululersinnaasut ukkatariniarpagut.

Misissuisarnermut periuseq nutaaq

Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:  

Tassa utoqqaat inuillu uummatikkut puatigullu nappaateqartut tunillatsissimanermillu ersiuteqartut misissortikkiartorsinnaapput. 

Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.

Tamanna misissuisarfiit napparsimmaviillu malinnaasinnaajunnaarnerannik pissuteqarpoq.

Neriniartarfiit imerniartarfiillu sapaatini akunnerni marlunni tulliuttuni unnukkut quliniit ullaakkut tallimat tungaanut matoqqasassapput. 

Nakorsaaneqarfiup oqarnera naapertorlugu napparsimmavimmut uninngasut amerlassusaat arfininngormat qulingiluaasut arfininngormalli nutarterneqarsinnaasimanngillat.

Illoqarfinnit ataasiakkaanit tunillatsissimasut amerlassusaasa nutarternissaat aamma ajornakusoorpoq, Nakorsaaneqarfik nalunaarpoq.

Nunatsinni tunillatsissimasut ataatsimut amerlassusaat misissuisarnermi periuseq nutaat pissutigalugu suli saqqummersinneqanngillat.

- Nunatsinni siammasissumik tuniluuttoqarpoq. Sapaatini akunnerni tulliuttuni aggersuni akisussapput, Henrik L. Hansen oqarpoq.

- Qaanaami, Upernavimmi Uummannamilu maanna tuniluuttoqannginneruvoq. Ilulissanili tuniluuttoqarnerpaavoq, utoqqaat illuanni tuniluuttoqarpoq, tamannalu unammillernangaatsiarpoq, tamanna nunatsinni illoqarfinni allani aamma taamaannissaa naatsorsuutigissavarput.

- Sisimiut utoqqaat illuanni aamma tuniluuttoqangaatsiarpoq – sumiiffiillu taakku tuniluuttoqarfiunnginnissaat kissaatigigaluarparput.

Nuummi amerlanerpaaffissaat tikingajaleraat

Coronamik tuniluuttoqangaatsiarnerani aamma nutaarsiassatsialaqarpoq - pingaartumik illoqarfiit pingaarnersaanni ukiarli tuniluuttoqarfiusimasumi.

- Maniitsumi aamma tuniluuttoqangaatsiarpoq. Nuummi sapaatini akunnerni arlalinni tuniluuttoqarpoq, sapaatit akunnialui qaangiuppata taakku amerlanerpaaffissaanniilernissaat naatsorsuutigaarput.

- Paamiuni tuniluunneq aallartisalerpoq. Qaqortumi Narsamilu aamma tuniluuttoqarpoq – Nanortalimmi ikittuinnaat, tamannali sapaatip akunnerata tulliani allatut isikkoqarnissaa ilimagaarput, nakorsaaneq oqarpoq.

Misissueriaaseq nutaaq pissutigalugu nunatsinni tamarmi tunillatsissimasut amerlassusaat saqqummiunneqartarunnaarput.

Nunatsinni coronavirusi pillugu
killiffik

Uninngasut 0  
Toqusut 21  
Siullermik kapitissimasut 73%  
Aappassaa kapitissimasut 68%  
corona.nun.gl-imi kisitsit takukkit  
  Nutarterneqarpoq: 
  Apriilip 1-aat 14:00

corona_model_001.png

Nunatsinni coronavirusi pillugu

Coronavirusimik tunillatsinissaq pinaveersaaruk