Boldspil unionip corona pillugu malittarisassat unioqqutinneqarnerannik qulartoqarneratigut ajugaaniunnerit ingerlakkusunngilai. Toqqorsivimmit assiAssi: AWG2016/Claus Andersen-Aagaard

Corona pillugu malittarisassat qulassutigineqartut: Nuuk Boldspil Unionip ajugaaniunnissaq unitsikkaa

Futsalimik ajugaaniunnissaq sapaatiummat taamaatiinnarneqarpoq. Unammisussammi tamarmik corona pillugu malittarisassat naapertorlugit piumasaqaataasutut - kommunip killeqarfiisa iluanni najugaqarnersut qularutigineqarpoq.

- Sillimaniarnermiissaagut.

Nuuk Boldspil Unionip siulittaasua, Inuaraq Petersen oqarpoq. Nuummi boldspil unionip sapaammi aappassaanik ajugaaniunnissaq corona pillugu malittarisassat qulassutigineqarnerat pissutigalugu taamaatippaa.

Naalli illoqarfiup iluani Nuummi klubbinut ajugaaniutsitsisoqaraluartoq unammisussat tamarmik Nuummi aamma najugaqarnersut qulassutigineqarpoq. Coronalu pillugu malittarisassat naapertorlugit taakku Nuummi najugaqanngikkunik ajugaaniunnermi peqataasinnaanngillat.

AAMMA ATUARUK GIF: 2021-mi GM-ertoqarsinnaanera qularnartoqarpoq

Ajugaaniunnerup siulliup tassa novembarip ulluisa 15-iata kingorna qulartoqalerpoq.

Nuuk Boldspil Union naapertorlugu corona pillugu aqutsisoqarfik inunnit attavigineqarsimavoq. Taakku ajugaaniunnermut peqataarusullutik coronamut misissortikkumasimapput.

Katersuunnissamut malittarisassat

Inuit amerlanerpaamik 100-it januarip ulluisa 31-ata tungaanut illup iluani katersuussinnaapput. Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."

Ajugaaniunneq unitsinneqarallartoq

Nuuk Boldspil Unionip oqarnera naapertorlugu inuit taakku kommuninit allaneerput. Taamaammallu Nuummi isikkammik arsarnermi ajugaaniunnermi peqataaqqqusaanatik.

Taamaammat klubbit tamarmik peqataasussami allattorsimaffiaannik tunniussillutik unammisussatik kommunip killeqarfiini najugaqartuusut uppernarsassavaat.

Boldspil unionip corona pillugu malittarisassat unioqqutinneqarnerannik qulartoqarneratigut ajugaaniunnerit ingerlakkusunngilai.

Taamaammat ajugaaniunnerup aappaa taamaatiinnarneqarpoq. Ajugaaniunnerullu sinnera unitsikkallarneqarluni.

- Coronamut misissortinniartunik saaffiginnittoqarsimanera ilumoorpoq. Kommuninit allaneersut ajugaaniutsitsinitsinni peqataarusuttoqarpoq, Inuaraq Petersen oqarpoq, itisiliillunilu:

- Kikkut pineqarneri ilisimanngikkallartillugu Nuummi klubbit holdiminni Nuummeersuinnarnik peqataatitaqarnissaannik kisimi piumaffigisinnaavagut. Tamanna maanna uppernarsarsinnaanngikkutsigu taava nalunaarummut atuuttumut atatillugu ajugaaniunneq naammassisinnaangilarput, NBU-p siulittaasua oqarpoq.

Taamaammat angutit arnallu ajugaaniunnissaat taamaatinneqarallarpoq.

Corona pillugu aqutsisoqarfiup oqarnera naapertorlugu unammeqataasussat kommunimut allamut angalasimasut – Nuummili najugaqartut ajugaaniunnermi peqataarusuttut pineqarsinnaapput. Taamaattoqassappallu corona pillugu malittarisassat unioqqutinneqarnavianngillat.

Holdit allattorsimaffii misissorneqassasut

Tamannali ajugaaniunnerup sillimaniarneq pissutigalugu unitsinneqarneranut allannguinngilaq. Taamaammat holdit allattorsimaffii tamarmik maanna misissorneqassapput.

Ajugaaniunneq qaqugu aallarteqqissinnaanersoq maanna nalunarallartoq, Inuaraq Petersenip nassuiaatigaa.

- Peqqussuteqarfigineqanngillat, inatsimmilli malinninnertik qulakkeerniarpaat tamannalu ajunngilaq, Corona pillugu aqutsisoqarfiup aqutsisua, Nels Ulrich Winther oqarpoq.

Ajugaaniunneq angutit klubbinit tallimaneersut arnallu klubbinit sisamaneersut peqataaffigisaraat.

Holdimi ataatsimi amerlanerpaamik 17-inik peqataasoqarsinnaavoq, aaqqissuisullu corona pillugu malittarisassat malinnissaat pissutigalugu ajugaaniunneq agguarpaa, angutit taamaalillutik unammeqqaarlutik arnallu kingorna unammissallutik.

Nuuk Boldspil Unionip peqataasussat tamarmik ajugaaniunnerup aallartinnginnerani ullut 14-it sioqqullugit Nuummeereernissaat piumasaqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat