Corona pillugu malittarisassaq atorunnaartoq: Umiarsuit takornariartaatit nunatsinnut tikissinnaaqqilersut

Umiarsuarnut takornariartaatinut nunatsinnukarusuttunut nutaarsiassatsialaqarpoq.

Tamanna peqqissutsimut naalakkersuisup Kirsten Fenckerip, inuussutissarsiutinut naalakkersuisup Pele Brobergip kiisalu nakorsaanerup Henrik L. Hansenip tusagassiortunik katersortitsineranni tamanna saqqummiunneqarpoq.

Corona pillugu malittarisassat manna imaapput umiarsuit takornariartaatit nunatsinnukannginnerminni sapaatini akunnerni marlunni nunanut allaniissimagunik nunatsinnut taleqqusaanngillat.

Umiarsuit takornariartaatit 370-it nunatsinnukarniarlutik ukioq manna nalunaarnikuupput – tamannali piviusunngorsinnaanersoq qularnarsimavoq.

Malittarisassarli taanna marsip ulluisa aappaanit atorunnaassaaq.

- Piumasaqaat ataasiinnaavoq: Nunatsinni najugaqangitsut tamakkiisumik akiuussuserneqarsimanermut uppernarsaateqassapput, inuussutissarsiornermut naalakkersuisoq, Pele Broberg oqarpoq.

Tassa imaappoq umiarsuarni takornariartaatini ilaasut nunatsinnut tikissinnaassagunik coronapasimik takutitsisinnaasariaqarput.

Sulisitsisut illuatungiliuttut akerliusut

Umiarsuit takornariartaatit pillugit qularneq Sulisitsisut sapaatip akunnerata siuliani akerliussutigaa - Demokraatit Siumullu aamma taamaaliorput.

Umiarsuit takornariartaatit ullut 14-it sioqqullugit nunani allaniissimagunik nunatsinnut taleqqusaannginnerannut malittarisassaq 2020-mi juulip ulluisa 21-anni atuutilerpoq. Taamani Demokraatit Siumullu naalakkersuisoqatigiipput.

Malittarisassarlu taanna corona pillugu malittarisassani ilaasut kingulliit ilagaat. Corona pillugu killilersuinerit allat qaammammi matumani aamma atorunnaarsinneqarput: Coronapasimik takutitsisariaaruppugut, qanermut assiaqutit atorneqartariaqarunnaarput aamma imerniartarfiit neriniartarfiillu isersimasoqarsinnaassusertik malillugu isersimasoqarsinnaalerput.

Kastrupimi mittarfimmi pisattanik tunniussinissamut PCR-imik misissortissimanermut uppernarsaat Immersuiffik-Sumullu aamma atorunnaarnikuupput. Nunatsinnili najugaqanngitsut timmisartumut ikiniarunik tamakkiisumik akiuussuserneqarsimassapput. Malittarisassaq taanna umiarsuarmut ilaallutik nunatsinnukartunut sapaatip akunnerata siuliani aamma atuutilerpoq.

Umiarsuarmi taqqamik milittoorneq

Tamatuma saniatigut kommunit imigassamik nioqquteqarnissamut inerteqquteqarnerat kommunini pingasuni suli atuuffigisaani atorunnaarsinneqarpoq.

Taava sooruna umiarsuarnut takornariartaatinut aatsaat qasukkaasoqartoq?

- Umiarsuarmi takornariartaammi tuniluuttoqalissagaluarpat peqqinnissaqarfitta artukkerneqarsinnaanissaa ernumagalugu atorunnaarsinnikuunngilarput. Maannali tunillatsissimasut ikittunnguupput, peqqissutsimut naalakkersuisoq, Kirsten Fencker (Naleraq) oqarpoq.

Peqqinnissaqarfik maanna taama suliaqarsinnaava?

- Takornariaqarnermik ingerlatsisut amerlanerpaartaasa issimasut akiuussuserneqarsimanissaat piumasarissavaat, nakorsaaneq, Henrik L. Hansen oqarpoq.

Tamatuma saniatigut umiarsuarni nakorsaqakkajuttarpoq.

- Umiarsuarni takornariartaatini ilaasut agguaqatigiissillugit utoqqaanerusarput. Taakku umiarsuarni taqqamik milittoorlutillu allamik napparsimasarput. Kisianni uagut nalilerparput peqqinnissaqarnikkut suliaqarsinnaanissatsinnut corona akornutaanavianngitsoq, nakorsaaneq oqarpoq.

Nutarterneqarpoq....