Assi: KNR

Corona pillugu killiffik: Misissukkat 29-t akissutersineqarput – tamarmik tunillatsissimanngillat

Coronavirusimik nutaanik allanik tunillatsittoqanngilaq. Tunillatsissimasut Nuummi suli aqqaniliupput.

Inuit aqqanillit coronavirusimik tunillatsissimapput, taakkunannga sisamat peqqisseqqipput.

Nunatsinni inuit 718-it misissorneqarput.

Ullumi misissorneqartut 29-t akissutersineqarput, taakkunanngalu arlaannaalluunniit tunillatsissimanngilaq.

Tamanna nakorsaanerup tusagassiortunik ullumikkut katersortitsinermi oqaatigaa.

Peqqisseqqittutut nalunaarutigineqarneq - taavami?

Tunillatsissimasunit sisamat peqqisseqqipput.

Taakku tassa tunillatsissimanerminnut ersiuteqarunnaarsimapput.

Taakku inuiaqatigiit akornanni angalasinnaanngorput, nakorsaanerullu Henrik Hansen oqarnera naapertorlugu "ilisimatuussutsikkut ilisimasat naapertorlugit tuniluutsitsilernissamut ilimanaateqanngillat".

Tunillatsissimasut aqqanillit tamarmik Nuummi najugaqarput. Taakkulu tamarmik nunatsinnut angalasoqaqqusaajunnaannginneranni tunillatsissimallutik.

- Nunatsinnut angalaqqusaajunnaarnerup kingorna tunillatsissimasoqarneranut takussutissaqanngilaq, nakorsaaneq, Henrik Hansen oqarpoq.

Tunillatsissimasoq kingulleq arfininngormat paasineqarpoq. Nakorsaanerullu oqarnera naapertorlugu taanna ilaqutariit tunillatsereersimasut ilagaat.

AAMMA ATUARUK Tamaat isigalugu: Coronavirus pillugu killiffik

- Tunillatsittoq kingulleq ilaqutariit tuniluuffiusut nakkutigilluakkatta iluaniippoq, nakorsaaneq oqarpoq.

Tunillatsissimasut angerlarsimaffimminni mattuteqapput, Henrik Hansenip oqarnera naapertorlugu taakku malittarisassat tamaasa malippaat.

Tuniluuffiusut qassiiusut

Nakorsaanerup oqarnera naapertorlugu Nuummi tuniluuttoqarnera nakkutigilluarneqarpoq.

- Tunillatsissimasunit pingasunit siullernit tuniluuttoqarneranik takusaqanngilagut. Maannalu piffissangaatsiaq qaangiutereerpoq, tuniluuttoqalinnginnissaalu neriuutigaarput, nakorsaaneq Henrik Hansen oqarpoq.

- Marlunnik maani Nuummi tuniluuffiusunik naammattuuivugut. Kisianni oqaqqissaanga piffissaq sivisooq ingerlareerpoq. Naalli suliniutigisagut tamarmik iluatsippasikkaluartut malittarisassanik malinninniinnartoqarnissaa suli pingaaruteqarpoq. 

- Tuniluuttoqangaatsiarsorinngilara. Piffissamili matumani aalajangiusimaannassaagut. Tunillatsissimasuniimmi nutaanik suli tunillatsittoqarsinnaavoq, Henrik Hansen oqarpoq.

Siunissaq pillugu aqagu tusagassiortunik katersortitsisoqassasoq

Kim Kielsen ullumikkut tusarliissutinik saqqummiisuussasoq tusagassiortunut tallimanngornermi katersortitsisoqarnerani oqaatigineqaraluarpoq.

Illoqarfiimmi pingaarnersaanni sukannersunik inerteqquteqarlunilu killilersuineqarpoq, taakkulu apriilip arfineq-pingajuata - tassa pingasunngornerup tungaanut atuuttussaatinneqarput.

Timmisartumik angalasoqarnissaanut inerteqquteqarneq pingasunngornerup tungaanut aamma atuuppoq.

AAMMA ATUARUK Coronavirusip ernumassutigineqarnera: Atuarfiit timmisartuussinerillu matulersut

Inerteqquteqaannartoqassanersorli suli ilisimanngilarput - Kim Kielsenimmi ineqarnermut attaveqaqatigiinnermullu naalakkersuisoq, Karl Frederik Danielsen ullumikkut katersortitsinermi saqqummiitippaa. Taassumalu nunatta ammaqqinnissaanut apeqqut akissuteqarfigisinnaanngilaa.

- Kim ullumikkut katersortitsisussaagaluarpoq. Taava ullumikkut taakku saqqummiussassat ulapinnarpallaarneri piffissatornarpallaarneri pissutigalugit angumerineqangitsoorput - taamaattumik taakku aqagu saqqummiunneqassapput. Saqqummiiguni taava oqaaseqassaaq piffissaq tulliuttoq qanoq ingerlanneqartussaassanersoq, Karl Frederik Danielsen oqarpoq.

Isummersuutit