Assi: KNR

Corona pillugu killiffik: Misissukkanit ullumikkut akissutissaqanngitsoq

Misissukkanit akissutinik nutaanik ullumikkut takkuttoqanngilaq.

Coronamut misiliutaasunik Københavnimut Statens Serum Institutimut nassiunneqartunit akissutersiniarnermut ajutoortoqarpoq.

Nakorsaaneq Henrik Hansen tusagassiortunik katersortitsinermi oqarpoq.

- Misissugassat Danmarkimut nassiuppagut. Kukkuluttortoqarsimavorli, taama pisoqaqqinnginnissaa pillugu sulissuteqarpugut, nakorsaaneq oqarpoq.

AAMMA ATUARUK Tamaat isigalugu: Coronavirus pillugu killiffik

Nunatsinni tunillatsissimasut quliupput – tamarmik Nuummi najugaqarput.

Tunillatsissimasunit qulinit pingasut peqqisseqqipput, tunillatsissimasunillu Dronning Ingriup Napparsimmavissuanut unitsitsisoqanngilaq.

Nunatsinni 542-t coronavirusimut misissorneqarnikuupput.

Nammineq misissuivittaangajalersugut?

Nunatsinnit misissugassanik Danmarkimut assartuisarnermi periuseq ilungersunarpoq. Nakorsaanerup oqarnera naapertorlugu nunarput tamangajammi misissuiffigineqarpoq, misissugassalli Statens Serum Institutimut apuutinngikkunik akissutersineqarsinnaanngillaq.

Taamaammat misissugassat nunatsinni misissorneqartalernissaat nunatsinnit kissaatigineqangaatsiarpoq.

AAMMA ATUARUK Tamaat isigalugu: Nunarput qaqugu ammaqqissava? Ulluni arlalinni suli killilersuisoqassaaq

- Nunatsinni piaarnerpaamik misissuisinnaalernissatsinnut suliffeqarfik nunatta avataaniittoq isumaqatigiissuteqarfigalugu ippassaq atsiorneqarpoq, Henrik Hansen oqarpoq.

- Tamatuma aaqqissuunnissaa sulissutigaarput. Atortorissaarutinik ajornaatsumik atorneqarsinnaasunik aamma pisiniarsarivugut. Danskit nakorsaateqarnermut aqutsisoqarfiat nunatsinnik pingaarnerutitsinissaannik piumasaqarfigaarput. Narkorsaateqarnermummi aqutsisoqarfik naalagaaffeqatigiinni atortorissaarutinik nassiussuisarnermut sunniuteqarpoq. 

- Atortorissaarut USA-mi sananeqartarpoq, USA-milu piffissami matumani aamma unammillertoqangaatsiarpoq. Taamaammat Atlantikoq qulaallugu qaqugu nassiussisoqarsinnaanera nalileruminaappoq. Tamanna nunatsinni Covid 19-imut misissuiffissamik peqalernissatsinnut pilersaarusiornitsinnut pissutaasut aamma ilagaat.

Ammaaqqinnissamut ulluliisoqanngitsoq

Coronamik tunillatsissimasumik kingullermik paasisaqartoqarneranit sapaatip-akunnera maanna qaangiuppoq. Tunillaassortunik nappaalanersuaqarneranut ataatsimiititaliarsuullu nunatta ammaqqinnissaata isumaliutigineqalersinnaanissaanut minnerpaamik sapaatit-akunneri marluk ingerlassasut oqaatiginikuuaa. Timmisartulli qaqugu angalasinnaaleqqinnissaannut, neriniartarfiit atuarfiillu ammaqqinnissaannut suli ulluliisoqanngilaq.

Nakorsaanerup tamanna ullumi killiffik pillugu tusagassiortuni katersortitsinermi oqarpoq.

- Kim Kielsenip ammaaqqinnissamut pilersaarutit itinerusumik nassuiaateqarfigissavai - uanga tamanna ilisimasaqarfiginngilara, Henrik Hansen oqarpoq.

- Aamma tunillatsittoqanngiinnarnera naammanngilaq. Misissorneqartut eqqortut misissorneqarnerat aamma qulakkiissavarput, Henrik Hansen oqarpoq.

Inuiaqatigiit akornanni tuniluuttoqannginnissaa pingaarnerpaavoq. Misissuinerit amerlassusaata isiginiaannarnissaa naammanngilaq, Henrik Hansen oqarpoq.

Amerlasuunut poorskikkunni sulinngiffeqartoqangajalerpoq - sapaatip-akunneratali tullia tamaat - illoqarfiit pingaarnersaanni illoqarfinnilu allani misissortittoqarsinnaaginnassaaq.

Isummersuutit