Danmarkimit nunatsinnukartussat Air Greenlandimut kalaallilluunniit oqartussaanut sianinnginnissaannik, corona pillugu aqutsisoqarfiup pisortaata Hans-Peder Barlach Christensenip kaammattuuteqarfigaiAssi: KNR / Malik Brøns

Corona pillugu aqutsisoqarfik: Danmarkimit aallarneq ajuleqqasut billetsit pillugit sianerfigineqassapput

Danmarkimit timmisartumut ilaallutik nunatsinnut angerlarnissaminnut utaqqisut nammineerlutik Air Greenlandimut attaveqassanngillat. Taakku oqartussanit attavigineqassasut, corona pillugu aqutsisoqarfiup pisortaa erseqqissaavoq.

Ilanngutassiaq Hans-Peder Barlach Christensenip akisussuteqarnerata kingorna januaarip ulluisa 19-ianni nutarterneqarpoq.

- Iliuuseqarnasi. Air Greenlandimut sianernissaq iluaqutaanngilaq. Tamassi attavigineqassaasi.

Namminersorlutik Oqartussat ataanni corona pillugu aqutsisoqarfiup pisortaa, Hans-Peder Barlach Christensen oqarpoq.

Nunatta matuneratigut Danmarkimit angerlarneq ajuleqqasut imaluunniit angerlarneq ajuleqqasimasut nunatsinnut angerlarnissaminnut timmisartumut  billetsit nutaat pillugit paasissutissanik amigaateqarlutillu paatsuungasut KNR-imit tallimanngornermi oqaluttuaraarput.

AAMMA ATUARUK Angalasussat paatsiveerusimaaqisut: Jette bilitsinik sisamanik tunineqartoq

Hans-Peder Barlach Christensenilli oqarnera naapertorlugu ilaasussat Air Greenlandimut attaveqassanngillat.

Oqartussammi matusisoqarnerata nalaani aallarneq ajuleqqasut timmisartumut billetsit isumagineqarnerat tamaat tiguaat. Ilaasussat oqartussanit attavigineqarnissaminnut utaqqiinnassapput. Aallarnissamut ulloq ataaseq sioqqullugu sianerfigitittoqarsinnaavoq.

Hans-Peder Barlach Christensenilli taamaattoqannginnerarpaa. Ilaalussalli nunatta matoqqanerani Danmarkimit nunatsinnut timmisartumut billetsissartik taamaatiinnarusukkunikku februaarilluunniit ulluisa 28-ata kingornamut kinguartikkusukkunikku Air Greenlandip nittartagaatigut immersuisinnaasut innersuussutigineqarpoq.

Aqutsisoqarfiup pisortaa: Angalanissamut tamat aarlerisaaruteqarfigineqarnikuupput

Oqartussat ukioq manna januaarip ulluisa aqqaneq-aappaata tungaanut nunatsinnut angalanissat tamarmik taamaatiinnarneqartut 2020-mi decembarip ulluisa 30-anni nalunaarutigaat. Tamanna kingornatigut februaarip tungaanut sivitsorneqarpoq.

Tamanna covid-19-imik tunillatsissimasunik nunatsinni uppernarsarneqartut ikinnerpaatinniarnerannik pissuteqarpoq. Minnerunngitsumik virusi tunillaassuunnerusunngorluni Tuluit Nunaanni allanngortoq eqqunneqarnaveersaarneqarluni.

Tamatumalu saniatigut oqartussat Danmarkimut juullip ukiortaallu akornanni sakkortunerpaamik angalaqqusisimanngitsut, Hans-Peder Barlach Christensen erseqqissaavoq.

- Danmarkimukarneq nalorninarpoq. Aallarnasi, Hans-Peder Barlach Christensen uteqqiivoq, nangillunilu:

- Aaqqissuussineq una angalasussanut arlaannulluunniit uumisaarutaanngilaq. Inuit 55.000-it nunatsinnit aallanngitsut pillugit iliuusaavoq.

AAMMA ATUARUK Naalakkersuisut nunatsinnukarnissat unitsikkaat

Angalasussallu tamarmik nunatsinnut tikinnerisa aqaguani sianerfigineqarlutik angerlarsimaannarnissamut malittarisassat pillugit nassuiaateqarfigineqartut ilanngullugu oqaatigaa.

Hans-Peder Barlach Christenip Air Greenlandip suleqatiginera 'ilorrisimaarnarluinnartuunerarpaa'.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat