Angerlarsimaannarnissamut malittarisassat upernaaq atuuttut atuleqqeratarsinnaapput.Assi: KNR

Corona: Angerlarsimaannarnissamut piumasaqaateqaleqqissinnaasoq

Piffissami aggersumi Danmarkimukassamaaruit eqqarsaatigilluaqqaariuk, corona pillugu aqutsisoqarfik taama kammattuuteqarpoq.

Nakorsaanerup, Henrik L. Hansenip naalakkersuisullu Anna Wangenheimip (D) danskit kommuniinit aalajangersimasunit nunatsinnut angalagutta tikinnermi nammineq qinikkatsinnik angerlarsimaannassasugut sapaatip-akunnerata ataatsip missaata matuma siorna innersuussuteqarfigaatigut.

Ullumi – innersuussuteqarnermit ullut arfinillit qaangiutiinnartut – sukaterisoqaqqilerpasippoq. Tassa Danmarkimit sumiiffinnit tamanit nunatsinnukaruit ulluni tallimani angerlarsimaannassaatit ullullu tallimat qaangiunneranni misissorteqqissallutik. Tassa upernaaq malittarisassanik atuuttunik atulersitseqqinneq.

Angerlarsimaannarneq

Angerlarsimaannarninni pisuttuarsinnaavutit aamma najugaqatigisannut qanillisinnaavutit. 

Niuerniarsinnaavutit.

Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.

Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.

Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.

Tamanna Naalakkersuisut Siulittaasuata Naalakkersuisoqarfiani pisortap, Hans-Peder Barlachip KNR-imut uppernarsarpaa. Taanna corona pillugu aqutsisoqarfimmi aamma siulittaasuuvoq.

AAMMA ATUARUK Nunatsinnukartunut innersuussutit nutaat: Kommunit aappaluttut paatsuunganartut paasikkit

Tamannali suli qulakkeerneqanngilaq. Tamatumami piviusunngornissaanut politikerit siunnersuummut akuerseqqaartussaapput.

- Nalunaarut piareersaleruttorparput. Ulluni tallimani angerlarsimaannaqqusaanerup upernaaq atuuttoq atulerseqqinneqarsinnaanera sulissutigaarput, Hans-Peder Barlach oqarpoq.

Angerlarsimaannarmut malittarisassat atuussimasut qaqugu atulersinneqassappat? Tassa politikerit nalunaarummik qaqugu akuersissuteqassappat?

- Tamanna akisinnaanngilara, Hans-Peder Barlach oqarpoq.

Danmark tunillatsissimasut amerlangaatsiartut

Angerlarsiimmannarnissamut malittarisassat qaqinneqarneranut Danmarkimi tunillatsissimasut amerlassusaata piffissami kingullermi qaffasinneranik pissuteqarpoq.

Ullup ataatsip kingulliup ingerlanerani tunillatsissimasutut uppernarsarneqartut 559-iupput. Danmarkimi tunillatsissimasutut ullormi ataatsimi uppernarsarneqartut sapaatip-akunnerata ingerlanerani pingajussaa 500-init amerlanerupput. Danmarkimi coronavirusimik tunillatsissimasut aatsaat taama amerlatigisut sapaatip-akunnerata siuliani nalunaarsorneqarput.

AAMMA ATUARUK Napparsimavit, peqqippit angerlarsimaannaqqusaavilluunniit? Taamaappat innersuussutit qimerluukkit

Tamannalu pissutigalugu Danmarkimi kommunimit tunillaassuuffiungaatsiartumit nunatsinnut angalasunut nammineq qinikkamik angerlarsimaannarnissaq misissorteqqinnissarlu sapaatip-akunnerata siuliani innersuussutigineqarput.

AAMMA ATUARUK Danmarkimi aappaluttumik nalunaarsorsimasumiissimaguit nammineq qinikkamik aninaveersaartariaqarputit

Danmarkimi tunillaassuuffiusut agguataarnerat nikerarpoq. Kommunit ilaat tunillaassuuffiungaatsiarput, ilaallu tunillaassuuffiuvallaaratik.

- Inuit Danmarkimut angalanissaannut inerterisinnaanngilagut. Inunnulli innersuussutigigut ersaripput: Aallarniarnersusi isumaliutigisiuk. Coronap aappassaanik tunillaassuuffigisaanut angalassaasi. Angalanissaq pisariaqarpa? Danmarkimut sulinngiffimmi angalanissaq pisariaqarpa? Sulinermi angalanissaq pisariaqarpa? Aarlerinartoqarpoq. Inunnut ataasiakkaanuinnaanngitsoq inuiaqatigiinnulli tamanut, Hans-Peder Barlach oqarpoq.

Ullumi ataatsimiinnissaq

Nuummi Kulturikkut Illorsuarmi ualimut nalunaaqutaq 16.30 oqallinnermik ataatsiittoqarnissaanut ilaatigut Kalaallit Nunaanni timersoqatigiit kattuffiat, sulisitsisut, SIK, KNAPK, tusagassiortullu aggersarneqarput.

Ataatsimiinnermi corona pissutigalugu Danmarkimi pissutsit tamatumalu nunatsinnit suliffeqarfinnit Danmarkimut angalasoqarnissaanut kingunerisa oqallisiginissaat siunertaavoq. Tassanilu angelrarsimaannarnissamut malittarisassat aamma oqaluuserineqassapput.

AAMMA ATUARUK Tamaat isigalugu: Coronavirus pillugu killiffik

Danmarkimi killilersuinerit nutaat sapaatini-akunnerni kingullerni atulersinneqarput. Killilersuinerilli tunillatsittut amerlassusaannut appaataassanersut paasinissaannut sapaatit-akunneri pingasut tikillugit ingerlaqqaarsinnaapput.

Nunatsinni nutaanik suli tunillatsissimasoqanngilaq. Kingullermik tunillatsissimasumik Nanortalimmi juulimi uppernarsaasoqarpoq.

Nunatsinni tunillatsissimasut katillugit 14-iusimapput. Taakkunannga napparsimmavimmut unittoqarnikuunngilaq, tamarmillu peqqisseqqinnikuullutik.

Nunatsinni coronavirusi pillugu
killiffik

Tunillatseqqasut 36  
Ullumi tunillatsittut 9  
Siullermik kapitissimasut 71%  
Aappassaa kapitissimasut 65%  
Tunillanneqarsimasut 654  
Uninngasut 0  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Oktobarip 15-iat 11:30
 

Coronavirusimik tunillatsinissaq pinaveersaaruk