Corona allaaneq nutaaq SSI-p alaatsinaappaa – Danmark-imi takuneqarnikuunngilaq

Statens Serum Institut-imi (SSI) corona allaaneq nutaaq B.1.1.529, Sydafrika-mi nassaarineqartoq alaatsinaanneqarpoq.

Nualluulli allaaneq nutaaq taanna seruminstitutimi suli maanna isumaaluutigineqanngilaq, nakorsaaneq Anders Fomsgaard oqarpoq.

- Taassuma tunillaassoriaasaa imaluunniit akiuussutissat tassunga qanoq sunniuteqarnersut oqaatigissallugu suli ilimasakippallaaqaagut. Suli tamanna piaarpallaarpoq, taanna oqarpoq.

Corona allaaneq nutaaq taanna Botwana-mi Hongkong-imilu takuneqarnikuuvoq, sisamanngormallu Sydafrika-mi aamma taassumannga tunillatsittoqarsimasoq oqartussaat nalunaarutigalugu.

Anders Fomsgaard-ip oqaatigaa, Sydafrika-mi kisitsisit takutikkaat taanna siornatigorniit sukkanerujussuarmik tunillaassuuttartoq.

Corona allaaneq nutaaq corona-p allannguutaaniit allaniit qaavata allaanerunera allaanerussutigaa. Taamaammat imaassinnaavoq, akiuussutissat manna tikillugu sananeqartartut tassunga akiuussutissiisinnaanngitsut.

Corona allaanerusoq nutaaq nassaarineqarmat, Sydafrika-meersut Afrika-milu nunaniit allaniit tallimaneersut Tuluit Nunaannut iseqqusaannginnerannik aalajangiisoqarnera, Sydafrika-mi nunanut allanut ministereqarfiup ”tuaviupiluullugu” aalajangernerunerarpaa.