Corona allaaneq nutaaq nunarsuatsinni tamani isumaaluutigineqarpoq

Corona taanna nutaaq Sydafrikami nassaarineqartoq, virusit pillugit immikkut ilisimasallit peqqinnissaqarfinnilu oqartussat naapertorlugit isumaaluutigisassaavoq.

Taanna nutaaq, B.1.1.529-mik taaguuserneqartoq sananeqaatsimigut annertuumik allanngorarpoq, virolog Tulio de Oliveira Sydafrikami tuaviuussamik tusagassiortunik sisamanngornermi katersuutsitsinermini nassuiaavoq.

- Coronap sananeqaatsimigut annertuumik allanngorarluni assigiinngiiaarnerulernermigut, virusip qanoq pissuseqarnera isumaaluutigineqarpoq.

Nappaatit tunillaassuuttarneri pillugit immikkut ilisimasallit pisortaat, epidemiolog Maria van Kerkhove, Nunarsuatsinni Peqqinnissaq pillugu kattuffimmi, WHO-mi atorfilik oqarpoq.

WHO: Corona allaaneq nutaaq taanna sapaatip akunnerini arlalinni paasiniartariaqassaaq.
WHO nalunaarpoq, nutaaq taanna maanna Sydafrikami nassaarineqartoq sukumiisumik alaatsinaanneqartoq. Corona nutaaq taanna nunat tamat akornanni assut isumaaluutigineqarluni.

Corona nutaaq maanna Sydafrikami nassaarineqartoq, sapaatip akunnerini arlalinni paasiniaaffigisariaqassasoq, WHO isumaqarpoq.

Coronap nutaap qaavata allaanerunera ilisimaneqartunit allaanerussutaavoq. B. 1.1.529 ilumini allaanerusumik proteineqarmat, imaassinnaavoq maanna akiuussutissatut atorneqartut tassunga akiuussutaasinnaanngitsut.

Nakorsaasiorfiit Pfizer aamma BioNTech, maanna akiuussutissanik sanasartut naliliinerat naapertorlugu, akiuussutissat maanna atorneqartut coronamut nutaamut qanoq sunniuteqartarneri sapaatip akunnerini marlunni paasiniaqqaartariaqassaaq.

Nakorsaasiorfiit maanna akiuussutissatut sanasagaat allanngortinneqartariaqassappata, tamanna annerusumik ajornartorsiutaasariaqanngilaq.

Nutaarsiassat kingulliit naapertorlugit coronamik taassumannga B.1.1.529-mik Belgiami marluk tunillatsissimasinnaasut nassaarineqarsimapput.